کھانے میں تھوک اور پیشاب ملانے کی افواہی ویڈیوز سے بھارتی ریاستوں میں شور مچ گیا

کھانے پینے کی اشیا میں ’تھوک‘، ’پیشاب‘ اور مٹی ملانے کی مبینہ ویڈیوز سامنے آنے کے بعد بھارت کی دو ریاستوں اتراکھنڈ اور اُتر پردیش کی حکومتیں ایسے افراد کے خلاف سخت جرمانے اور قید کی سزا کے قوانین بنانے پر غور کر رہی ہیں۔

شمالی ریاست اتراکھنڈ خلاف ورزی کرنے والوں پر ایک لاکھ روپے تک جرمانہ عائد کرنے کا ارادہ رکھتی ہے، جبکہ اتر پردیش اس معاملے کے حل کے لئے سخت قوانین متعارف کرنے پر غور کر رہی ہے۔

حکومت کی یہ ہدایات سوشل میڈیا پر ایسی غیر مصدقہ ویڈیوز کے سامنے آنے کے بعد جاری کی گئی ہیں جن میں مقامی دکانوں اور ریستورانوں میں کھانا تیار کرنے والوں کو اس کے لیے تھوکتے ہوئے دکھایا گیا ہے، اور ایک ویڈیو میں ایک گھریلو ملازمہ کو اپنے پکائے ہوئے کھانے میں پیشاب ملاتے ہوئے پایا گیا ہے۔

گذشتہ روز بھارت کی سب سے بڑی ریاست اتر پردیش کے وزیر اعلیٰ نے بھی دکانوں سے متعلق ایک ایسا ہی حکم نامہ جاری کیا، جس کا مقصد ’کھانے پینے کی اشیا میں ملاوٹ‘ روکنا بتایا گیا ہے، لیکن سماجی اور سیاسی کارکنوں کا کہنا ہے کہ اس حکمنامے کے دور رس نتائج ہو سکتے ہیں۔

اس حکم نامے میں یہ کہا گیا ہے کہ ’کھانے پینے کی اشیا فروخت کرنے والے تمام دکاندار اپنے فوڈ سینٹرز پر آپریٹرز، پروپرائٹرز اور منیجرز کے نام اور پتہ ظاہر کرنے کے لیے پابند ہیں۔‘

سوشل میڈیا پر ان ویڈیوز کے سامنے آنے کے بعد لوگوں نے شدید غم و غصے کا اظہار کیا ہے۔ كثير لوگوں نے ریاستوں میں فوڈ سیفٹی پر خدشات کا اظہار کیا ہے۔ تاہم کچھ ویڈیوز کو مسلمانوں کو نشانہ بنانے کوشش بھی قرار دی جا رہی ہے، جن پر یہ الزامات لگائے جا رہے ہیں اُن کی مکمل تحقیق کے بعد ان الزامات کو مسترد کر دیا گیا ہے۔

سوشل میڈیا پر بہت سے لوگوں نے یہ الزام لگایا تھا کہ کھانے میں پیشاب شامل کرنے والی خاتون مسلمان تھیں، لیکن تحقیقات کے بعد معلوم ہوا کہ وہ خاتون ہندو تھیں۔

حکام کا کہنا ہے کہ سخت قوانین ضروری ہیں اور ان کا مقصد ’کھانے پینے کی اشیا میں ملاوٹ‘ روکنا ہے، لیکن حزب اختلاف کے رہنماؤں اور قانونی ماہرین نے ان قوانین کی افادیت پر سوال اٹھائے ہیں اور یہ بھی کہا ہے کہ انہیں ایک مخصوص کمیونٹی کو بدنام کرنے کے لئے غلط طور پر استعمال کیا جا سکتا ہے۔

بھارت کے ایک بڑے انگریزی اخبار انڈین ایکسپریس نے اتر پردیش کی جانب سے تجویز کردہ آرڈیننس پر تنقید کرتے ہوئے لکھا ہے کہ ’ان کے نتیجے میں فرقہ وارانہ فساد بڑھ سکتا ہے اور پہلے سے غیر محفوظ اقلیت کو نشانہ بنایا جانے کے امکانات میں اضافہ ہو سکتا ہے۔‘

فوڈ سیفٹی بھی بھارت میں ایک سنجیدہ معاملہ ہے۔ فوڈ سیفٹی اینڈ سٹینڈرڈ اتھارٹی (ایف ایس ایس اے آئی) کے مطابق، غیر محفوظ کھانا سالانہ تقریباً 60 کروڑ انفیکشنز اور چار لاکھ اموات کا سبب بنتا ہے۔

بھارت میں ماہرین خوراک کے ناقص معیار کی مختلف وجوہات بیان کرتے ہیں، جن میں عمومی قوانین کا نفاذ اور آگاہی کی کمی شامل ہے۔ تنگ باورچی خانے، گندے برتن، آلودہ پانی، اور نامناسب نقل و حمل اور ذخیرہ کرنے کے طریقے کھانے کے معیار سے متعلق خدشات بڑھاتے ہیں۔

لہٰذا، جب دکانداروں کی کھانے میں تھوکنے کی ویڈیو سامنے آئی، تو لوگ حیران اور مشتعل ہو گئے۔ اس کے بعد اتراکھنڈ نے ایسے افراد پر بھاری جرمانوں کا اعلان کیا اور پولیس کو یہ ہدایات جاری کیں کہ ہوٹل کے عملے کی تصدیق کی جائے اور باورچی خانے میں سی سی ٹی وی کیمروں کی تنصیب کو یقینی بنایا جائے۔