دوستی کا اختتام: مدثر کے ساتھ اگر دوست دوست نہ رہے تو اس بریک اپ کا سامنا کیسے کریں؟

’دوستی کا اختتام مدثر کے ساتھ‘ انٹرنیٹ پر وائرل ہونے والے کئی مزاحیہ میمز میں سے ایک ہے جو پاکستانیوں نے بنائے۔

نو سال قبل پاکستان کے شہر گوجرانوالہ کے ایک سرکاری ملازم محمد آصف رضا نے اس کی بنیاد اپنے فیس بک پر رکھی تھی جب انھوں نے کہا تھا کہ ’ان کا دوست مدثر اب خود غرض ہو گیا ہے۔‘

اس میم کے بعد جہاں مدثر سے ان کی دوستی بحال ہوئی وہیں انٹرنیٹ پر انھیں عالمی شہرت حاصل ہوئی۔

اس کے بعد یہ میم پاکستان کا پہلا این ایف ٹی بھی بن گیا، جسے ہزاروں ڈالر کے عوض فروخت کیا گیا۔

این ایف ٹی سے مراد نان فنجیبل ٹوکن ہے۔ یہ ایک خاص قسم کا ڈیجیٹل سرٹیفیکیٹ ہے جو کہ اس بات کی گواہی دیتا ہے کہ کسی مزاحیہ میم، تصویر، ویڈیو یا دیگر قسم کے آن لائن مواد کا اصل مالک کون ہے۔

خیر یہ تو بات تھی آصف رضا اور مدثر کی دوستی ختم ہونے، میم کے مشہور ہونے اور پھر مدثر اور آصف رضا کی دوستی دوبارہ ہونے کی لیکن آج ہم آپ کو بتاتے ہیں کہ اگر آپ کا کوئی دوست آپ سے تعلق توڑ لے تو کیا کیا جائے۔

دوستی ہماری زندگی کا اہم حصہ ہوتی ہے۔ Uses in Urdu کے لیے مولی گورمین اپنی تحریر میں لکھتی ہیں کہ سنہ 2019 کے موسم بہار میں پہلی بار ان کی ایک دوستی ختم ہوئی۔

اس ’بریک اپ‘ پر تلخ بحث ہوئی، آنسو بہائے گئے اور شدید مایوسی ہوئی اور ہم نے تب سے بات نہیں کی۔

کئی برس تک میں اپنی وہ دوستی ختم ہونے کا سوگ مناتی رہی۔ حتیٰ کہ اب پانچ برس بعد بھی میں خواب میں کبھی کبھی اس دوست کو دیکھتی اور سوچتی ہوں کہ کیا ہمارا دوبارہ رابطہ بحال ہو سکتا ہے۔

تاہم میں نے اس حقیقت کے ساتھ سمجھوتہ کر لیا ہے کہ جب تک وہ دوستی قائم رہی، وہ بہترین تھی۔

اتفاق سے میرا پہلا رومانوی تعلق بھی میری یہ دوستی ختم ہونے کے پانچ ماہ بعد ختم ہو گیا۔ مجھے اس کے بارے میں بات کرنا بہت آسان لگا۔۔۔ کئی برسوں کی موسیقی، فلموں اور دل ٹوٹنے پر لکھی جانے والی کتابوں نے مجھے اس کے لیے اچھی طرح سے تیار کیا تھا۔

تب سے ہی میں نے یہ محسوس کرنا شروع کیا کہ رومانوی تعلقات کے مقابلے میں دوستی ختم ہونے پر بہت کم بات کی جاتی ہے۔

تاریخی طور پر ہماری صحت اور زندگی پر مثبت اثر رکھنے کے باوجود بھی دوستی کے رشتے کو محققین کی جانب سے دیگر تعلقات کے مقابلے میں بہت کم توجہ ملی ہے۔

یونیورسٹی آف مینیسوٹا کی نفسیات کی پروفیسر گریس ویتھ کہتی ہیں کہ 'شاید یہ بات لوگوں کے لیے حیران کن ہو گی کہ ہم (محققین) اب اس بارے میں غور کرنے لگے ہیں کہ دوستی کیسے ختم ہو سکتی ہے۔۔۔ واقعی اس بارے میں کام اب شروع ہونے لگا ہے۔'

وہ کہتی ہیں کہ 'چونکہ دوستی ختم ہونے کے بارے میں بہت کم بات کی جاتی ہے، اس لیے لوگوں کو علم نہیں ہوتا کہ ایسا ہو جانے کی صورت میں اپنے جذبات کو کیسے سنبھالا جائے۔ کسی رومانوی ساتھی سے تعلق ختم ہونے کے بارے میں بہت واضح سماجی سکرپٹ موجود ہے لیکن دوستی ختم ہونے کے بارے میں ایسا کچھ نہیں۔'

ہمیشہ کے لیے دوست؟

سٹیٹ یونیورسٹی آف نیویارک کالج کی نفسیات کی ایسوسی ایٹ پروفیسر کیٹلین فالانرے کہتی ہیں کہ 'بچپن میں ہمیں سب سے پہلے حمایت اپنے والدین سے ملتی ہے لیکن جیسے جیسے ہم بڑے ہوتے ہیں تو معاشرے میں رہنے کے لیے ہم اپنے ساتھیوں کے ساتھ زیادہ وقت گزارتے ہیں۔'

'دوستوں کے ساتھ ہمارا تعلق مختلف ہوتا ہے، وہ زندگی بھر شناخت بنانے میں ہماری مدد کرتے ہیں۔ ہم اپنے دوستوں کو بطور آئینہ اور گائیڈ استعمال کرتے ہیں۔'

گریس ویتھ کہتی ہیں کہ ابتدائی طور پر دوستی مماثلت اور قربت پر استوار ہوتی ہے۔

پروفیسر کیٹلین فالانرے کہتی ہیں کہ 'ہم سوشل مخلوق ہیں۔ ہم چاہتے ہیں کہ ہمیں قبول کیا جائے۔ ہم ایسا صرف اپنے خاندان سے ہی نہیں بلکہ اپنے دوستوں سے بھی چاہتے ہیں اور پھر یہاں ہی سے دوستیاں نہ صرف ہمیں حمایت بلکہ تفریح اور کمپنی کا ذریعہ بھی بنتی ہیں۔'

زیادہ تر تحقیق بچپن اور لڑکپن میں دوستی ختم ہو جانے پر مرکوز کی جاتی ہے، ایک ایسی عمر جب دوستی ختم ہو جانا کافی عام ہوتا ہے۔

کیٹلین فالانرے کی ایک تحقیق میں مڈل سکول کے 354 طلبا پر مشتمل (جن کی عمر 11 سے 14 سال کے درمیان تھی) سیمپل کو دیکھا گیا۔ اس میں 86 فیصد بچوں نے کہا کہ ان کی کسی سے دوستی حال ہی میں ختم ہوئی۔ زیادہ تر نے اس کی وجہ کوئی تنازعہ یا دھوکہ قرار دیا۔

ایک اور وجہ دوستوں کی طرف سے سپورٹ کی کمی تھی، یا وہ بچے یہ محسوس کر رہے تھے کہ انھیں اپنے دوستوں سے وہ چیز نہیں مل رہی، جس کی وہ ضرورت محسوس کرتے ہیں۔ مثال کے طور پر کمپنی، یا ایک دوسرے کے ساتھ مزہ نہ آنا۔

دوستی ختم ہونے نے مڈل سکول کے بچوں میں مبینہ طور پر پیچیدہ جذبات کو جنم دیا، جس میں صرف اداسی ہی نہیں بلکہ خوشی کے جذبات بھی شامل تھے اور ان کا انحصار اس چیز پر تھا کہ دوستی کیسے ختم ہوئی اور کس نے اسے ختم کیا۔

وہ کہتی ہیں کہ ’میں جانتی ہوں کہ بہت سے لوگ اپنے دوستوں کو دیکھتے اور سوچتے ہیں کہ یہ تعلقات آپ کی زندگی میں آسانی اور بہت سی خوشی، مزہ اور ہنسی لے کر آئیں۔‘

وہ مزید کہتی ہیں کہ ’یہ ضرور سچ ہے، لیکن شاید یہ خیال ہمیں اس بات کی طرف لے جاتا ہے کہ دوستوں کے ساتھ تنازعات پر بات کرنے یا حل نکالنے کا کوئی خاص فائدہ نہیں۔‘

فلالنرے کے مطابق، رومانوی تعلقات اور دوستی دونوں کے جذباتی فوائد ہوتے ہیں، جیسے گرمجوشی اور خوشی کا احساس۔ مگر ان میں ایک اہم فرق بھی ہے: رومانوی تعلقات میں صرف ایک خاص ہونے کی توقع ہوتی ہے۔ اگرچہ یہ ثقافتوں اور انفرادی سطح پر مختلف ہے، عام طور پر یہ توقع ہوتی ہے کہ آپ کا صرف ایک ساتھی ہے، اور اس رشتے کے اصول واضح ہیں جبکہ دوستیوں میں ایسا کوئی خاص اصول نہیں ہوتا، جو اس کو مزید پیچیدہ بنا دیتا ہے کیونکہ ہم دوستی میں حسد محسوس کرتے ہیں۔

دوستی ہمیشہ باہمی طور پر خصوصی نہیں ہوتی۔ اگرچہ ہمیں اس بات سے کوئی فرق نہیں پڑنا چاہیے، درحقیقت ہم ایک بہت ہی قریبی دوست کے دوسرے قریبی دوست کے بارے میں حسد جیسا احساس محسوس کر سکتے ہیں۔

فلالنرے کہتی ہیں کہ یہ احساس کچھ ایسا ہوتا ہے کہ ’کیونکہ یہ شخص میرے لیے بہت اہم ہے لیکن اس کے ساتھ کوئی اور بھی ہے جو اس کے لیے بہت اہم ہے۔‘

یہ یاد رکھنا مددگار ثابت ہو سکتا ہے کہ انہیں دیگر دوست رکھنے کی اجازت ہے اور یہ کہ اس سے ہماری دوستی کو خطرہ نہیں ہے۔

اگرچہ دوستی کی نفسیات پر تحقیق اب بھی سامنے آ رہی ہے، یہ رشتے ہماری روزمرہ کی زندگی میں اکثر توجہ اور توانائی لیتے ہیں۔

پیو ریسرچ سینٹر کے ایک حالیہ سروے کے مطابق، جس میں 61 فیصد امریکی بالغوں نے حصہ لیا، لوگوں کا کہنا تھا کہ قریبی دوست ہونا ان کے لیے ایک بھرپور زندگی گزارنے کے لیے انتہائی یا بہت ضروری ہے۔

اس کی ایک وجہ یہ ہو سکتی ہے کہ لوگ شادی کر رہے ہیں اور بعد میں زندگی میں بچے پیدا کر رہے ہیں۔ امریکہ اور برطانیہ سمیت دنیا بھر میں لوگوں کی شادی کرنے کی اوسط عمر میں اضافہ ہوا ہے۔ برطانیہ میں مرد اور خواتین اب پہلی بار شادی کرنے سے پہلے 30 سال سے زیادہ عمر تک پہنچنے کا انتظار کر رہے ہیں جبکہ امریکہ میں بھی یہ اعداد و شمار اسی عمر کے ارد گرد ہیں۔

اس کا مطلب یہ ہے کہ ہماری زندگی کے ایک بڑے حصے کے لیے دوست وہ استحکام اور مدد فراہم کر سکتے ہیں جو پہلے شادی کا رشتہ فراہم کرتا تھا۔

فلالنرے کہتے ہیں کہ رومانوی تعلقات میں جوڑوں کا تعلق توڑ دینا اور پھر بعد میں کچھ سوچ بچار کے بعد دوبارہ اکٹھے ہو جانا کوئی معمولی بات نہیں ہے۔

کیا یہ وہ چیز ہے جس کے بارے میں ہمیں اپنے سابقہ دوستوں کے ساتھ بھی غور کرنا چاہیے؟ ایک مفاہمت اور دوسری کوشش؟ ایک بار پھر، یہ دوستی کی نوعیت پر منحصر ہے۔

فالانرے کا کہنا ہے کہ ’میرا خیال ہے کہ جب کسی کے ساتھ دوبارہ دوستی ہو جاتی ہے تو اس وقت کے حالات پہلے سے مختلف ہوتے ہوں گے۔ یا شاید کبھی یہ بہتر ہوتا ہے کہ اس دوستی کو ختم ہونے دیا جائے۔۔

وہ کہتے ہیں کہ ایک بار پھر یہ اس بات پر منحصر ہو سکتا ہے کہ کیا آپ کو دوستی ختم ہونے پر سکون محسوس ہوتا ہے؟ کیا وہ دوستی آپ کی زندگی میں مثبت فوائد کا اضافہ کر رہی تھی؟ اگر آپ اب بھی محسوس کرتے ہیں کہ آپ واقعی ان کی کمی محسوس کرتے ہیں، تو شاید یہ تعلق دوبارہ جوڑنے کے قابل ہو۔‘