نوعمری کے تعلقات اور استحصال: میری بیٹی اپنے قاتل کے بدسلوکی والے رویے کو نہیں سمجھ سکی-1

چودہ سالہ ہولی نیوٹن کو ان کے بوائے فرینڈ نے استحصال سے بھرے رشتے سے جان چھڑانے پر قتل کر دیا۔ قاتل اب جیل میں ہے، تاہم ہولی کے خاندان اور پولیس کا کہنا ہے کہ ان کی کہانی باقی نوجوانوں کے لیے ایک سبق ہے۔

ہولی کی والدہ میکالا ٹرسلر کہتی ہیں کہ ہولی کو اپنی زندگی کے آخری دن تک یہ احساس نہیں تھا کہ وہ گھریلو تشدد کا شکار ہیں۔

وہ بتاتی ہیں کہ 'مجھے نہیں لگتا کہ اسے یہ محسوس ہوا کہ وہ کیا کر رہا ہے، یہاں تک کہ اس پر اختیار جمانا بھی ایک قسم کا استحصال تھا۔'

میکالا کے مطابق لوگن میکفیل ہولی کے پہلے اور واحد بوائے فرینڈ تھے۔ وہ دونوں آرمی کیڈٹ میں ملے اور 18 ماہ تک معمول کے نوجوانوں کی طرح رشتہ میں رہے۔

وہ ویک اینڈ اپنے خاندان کے ساتھ گزارتا تھا۔ میکالا کے پاس ان دونوں کی اس گھر میں گانے اور ڈانس کرتے ہوئے کی ویڈیوز ہیں۔

لیکن جب ہولی نے رشتہ ختم کرنے کا فیصلہ کیا تو میکفیل نے اسے 'جذباتی طور پر بلیک میل' کرنا شروع کر دیا اور کہا کہ وہ خود کو نقصان پہنچا لے گا اور گھریلو تشدد کی تمام علامات ظاہر کیں۔

وہ کہتی ہیں 'وہ ہولی کے لیے جنونی تھا۔ اگر وہ اس کی تھی تو کسی کی نہیں ہو سکتی تھی۔'

میکفیل کی عمر 17 برس تھی جب انھوں نے جنوری 2023 میں ہولی کو چاقو کے وار کر کے قتل کر دیا۔

یہ بہت خوفناک حملہ تھا اور میکفیل نے ایک منٹ کے اندر چاکو کے 36 وار کیے۔

انھوں نے قتل کے مقدمے کے دوران اعتراف کیا کہ یہ رشتہ شاید بدسلوکی اور کڑواہٹ سے بھرا تھا۔

میکالا کا کہنا ہے کہ میکفیل دراصل ہولی کو کنٹرول کرنا چاہتا تھا اور جاننا چاہتا تھا کہ 'وہ سارا وقت کہاں رہتی ہے۔'

ہولی کو جب مسائل نظر آنے لگے تو اس وقت تک بہت دیر ہو چکی تھی۔

میکالا چاہتی ہے کہ دیگر نوجوان بھی ان تنبیہی علامات کو پہچان لیں اور یہ کہ نوجوانوں کے درمیان گھریلو تشدد کو قانونی طور پر تسلیم کیا جانا چاہیے۔

وہ کہتی ہیں کہ ’مجھے لگتا ہے کہ ہمیں اب یہ سمجھنے کی ضرورت ہے کہ نوجوان بہت کم عمر ی میں تعلقات استوار کر رہے ہیں۔ ‘

’کسی کو کچھ نہیں بتایا‘

عینی (ان کا اصلی نام نہیں) جب 15 سال کی تھیں تو ان کا رشتہ بھی بدسلوکی سے پُر تھا۔ وہ بتاتی ہیں کہ ’وہ مجھے وہ سب پہننے نہیں دیتا تھا جو میں پہننا چاہتی تھی۔ میں نے ایک بار جا کر اپنے بال کٹوائے اور وہ اس سے خوش نہیں تھا۔ اس نے مجھے میرے سر پر ایک بیگ رکھنے کے لیے کہا۔‘

عینی جو اب اپنی عمر کے 20 ویں سال میں ہیں کہتی ہیں کہ ’وہ مجھے میں خامیاں نکالتا رہتا میرے وزن کے بارے میں، میری جِلد کا کیونکہ میں ایگزیما میں مبتلا ہوئی تھی اور اسے یہ پسند نہیں تھا اور اس نے اس کا مذاق اڑایا۔‘

’میں زیادہ میک اپ کرتی، کم میک اپ کرتی، میرے بالوں کا رنگ یا کچھ بھی۔‘

’وہ مجھے بدلنے کے طریقے تلاش کرتا رہتا۔ ‘

زبانی بدسلوکی بھی پرتشدد ہو گئی جب عینی کے پارٹنر نے حاملہ ہونے پر اس کا بازو توڑ دیا۔

ان کے بوائے فرینڈ نے اس بدسلوکی کو عینی کے خاندان سے چھپایا جن کے ساتھ دونوں رہتے تھے اور عینی کو یہ سمجھنے میں کافی وقت لگا کہ اصل میں کیا ہو رہا ہے۔

وہ کہتی ہیں کہ ’مجھے اندازہ نہیں تھا کہ یہ غلط تھا۔ میں نے سوچا کہ ہر کوئی ایسا ہی تھا کیونکہ وہ میرا پہلا حقیقی رشتہ تھا۔ میں کبھی کسی اور کے ساتھ نہیں رہی تھی اس لیے مجھے علم نہیں تھا اور میں نے کسی کو نہیں بتایا۔‘

وہ اب اس کے ساتھ نہیں ہیں اور نارتھ ٹائن سائیڈ میں ایکارنز پروجیکٹ کی وجہ سے انھیں مدد ملی ہے جو گھریلو تشدد کا سامنا کرنے والے نوجوانوں کی مدد کرتا ہے۔

میکالا کی طرح ان کا بھی خیال ہے کہ گھریلو تشدد سے متعلق قانون، جو فی الحال صرف 16 سال اور اس سے زیادہ عمر کے لوگوں کو بدسلوکی کا شکار قرار دیتا ہے، کا پھر سے جائزہ لینے کی ضرورت ہے۔