جب حارث رؤف نے آسٹریلیا کو پاکستان جیسا بنا دیا

کہانیاں تقریباً سب ایک جیسی ہوتی ہیں، مگر کہانی سنانے کا انداز اسے منفرد بناتا ہے۔ میلبرن کے حتمی نتیجے میں بھی یہ پاکستان کے آسٹریلوی دوروں کی روایتی کہانی تھی، مگر جس انداز سے پاکستان نے یہ کہانی سنائی، وہ اسے شائقین کے لیے فخر کا باعث بنا۔

آسٹریلوی کنڈیشنز میں بلے بازی کبھی بھی آسان نہیں ہوتی، اور ایشیائی بلے بازوں کے لیے یہ صورتحال مزید دشوار ہو جاتی ہے کیونکہ ان کو زندگی بھر کی سیکھ کو اچانک چھوڑ کر نیا سبق سیکھنا پڑتا ہے۔

پاکستانی بلے بازوں کے لیے یہ کنڈیشنز خاص طور پر مشکل تھیں، کیونکہ ایک ہفتہ قبل ہی ان کے پانچ بلے باز راولپنڈی کی اسپن کی گرد اڑاتی پچ پر کھیلنے کے طریقے سیکھ رہے تھے، اور آسٹریلوی سرزمین پر اترنے کے چوتھے روز انہیں اس تیز بالنگ کا سامنا کرنا پڑا جو اپنی ہوم کنڈیشنز میں دنیا کا بہترین بولنگ یونٹ ہے۔

کہا جا سکتا ہے کہ پاکستانی ٹاپ آرڈر زیادہ مثبت رویہ اپناتا تو بہتر ہوتا۔ اگر کامران غلام اس گیند کے سامنے سینہ تاننے کی بجائے جوش انگلس کے ہاتھوں میں گیند جانے دیتے اور سلمان آغا شارٹ پچ پر بہتر شاٹ سلیکشن دکھاتے تو پاکستان 30 سے 40 رنز مزید اپنے مجموعے میں شامل کر سکتا تھا۔

یہ بھی کہا جا سکتا ہے کہ اگر پہلے 20 اوورز میں پاکستانی بولرز اپنے ڈسپلن میں مستقل مزاجی دکھاتے تو انگلس اور سمتھ کی وہ مضبوط شراکت نہ بنتی جو میچ کے حتمی نتیجے میں فیصلہ کن ثابت ہوئی۔

مگر پاکستان کے لیے امید افزا پہلو یہ رہے کہ میچ میں پیچھے رہنے کے بعد انہوں نے اچانک پلٹ کر پے در پے جوابی وار کیے اور آسٹریلوی تھنک ٹینک کو تشویش میں مبتلا رکھا۔

اوپنرز کے جلد نقصان کے بعد محمد رضوان نے درست راستہ چنا جو اس مشکل پچ پر پاکستانی بیٹنگ کے لیے 50 اوورز کھیلنے کا موقع فراہم کر سکتا تھا۔ یہ دانشمندانہ اندازہ تھا کہ جیسے جیسے گیند پرانی ہو گی، بلے بازی میں کچھ آسانی پیدا ہو گی۔

اگرچہ بابر اعظم نے عمدہ آغاز کیا اور سکور بورڈ کو متحرک رکھا، مگر یہ رضوان کی اس صبر آزما اننگز کی بدولت ممکن ہو سکا کہ پاکستانی لوئر آرڈر کے کریز پر آتے تک گیند کی کاٹ کچھ نرم پڑ چکی تھی، اور نسیم شاہ نے اپنی بلے بازی کی خوبصورتی دکھائی۔

جس رفتار سے نسیم شاہ نے رنز جمع کیے، وہی پاکستان کو میچ میں واپس لانے کا سبب بنی۔ ورنہ خدشہ تھا کہ تین گھنٹوں میں پورا میچ ختم ہو جاتا۔ نسیم کے ان رنز نے نہ صرف اپنی ٹیم کو اعتماد فراہم کیا بلکہ اپنے بولرز کو بھی کچھ موقع دیا کہ وہ آسٹریلوی بلے بازوں کو آزما سکیں۔

اگرچہ دو ابتدائی کامیابیوں کے بعد پاکستانی بولنگ اپنے ڈسپلن سے کچھ انحراف کر گئی، مگر بہت جلد پیسرز نے اپنے اصل رنگ میں آ کر میلبرن کی مددگار پچ کا بھرپور فائدہ اٹھاتے ہوئے آسٹریلوی مڈل آرڈر کے بخیے ادھیڑ دیے۔

حارث رؤف کی بولنگ کی نوعیت کچھ ایسی ہے کہ وہ اپنی رفتار کے باعث مہنگے ہوتے ہیں، مگر جب وہ اپنے ریدم میں آ جاتے ہیں تو کسی بلے باز کے لیے ان کا سامنا کرنا ممکن نہیں رہتا۔

شاہین آفریدی کی دوسری وکٹ اور حارث رؤف کی تیسری وکٹ کے درمیان صرف پانچ گیندوں کا فاصلہ تھا، مگر ان پانچ گیندوں نے آسٹریلوی سکور بورڈ کو کوئی رن دیے بغیر تین اہم وکٹیں پھینک دیں۔