اب دو نہیں، ایک بار میں تناؤ پیدا ہوگا: پاکستانی فوج کے سربراہ کی مدت ملازمت میں توسیع کے اثرات کیا ہوں گے؟

فوج کے سربراہ کی مدتِ ملازمت میں اضافے کے فوج پر اثرات کے حوالے سے وہ کہتے ہیں کہ ’جہاں تک فوج کے اندرونی معاملات کا تعلق ہے، اس میں ایڈجسٹمنٹ کرنا پڑے گی کیونکہ فوج کے سربراہ کی ملازمت میں جب اضافہ ہوتا ہے تو ان کے نیچے موجود دو اسٹار اور تین اسٹار افسران کی مدتِ ملازمت کے لیے بھی کچھ ایڈجسٹمنٹ کرنی پڑے گی۔ یہ ممکن بھی ہے، یہ فوج کے دائرہ اختیار میں ہے یا پھر وہ اس کی منظوری لے سکتے ہیں۔‘

کیا فوج کے سربراہ کی مدتِ ملازمت میں توسیع کا کوئی سیاسی پہلو بھی ہے؟

پاکستانی سیاست میں فوج کی مداخلت کی ایک طویل تاریخ ہے۔ اس کا اندازہ اس بات سے لگایا جا سکتا ہے کہ پاکستان کی آزادی کے بعد فوجی سربراہوں نے تقریباً آدھے عرصے کے دوران ملک پر حکومت کی ہے۔

اپوزیشن جماعت پاکستان تحریکِ انصاف (پی ٹی آئی) نے افواج کے سربراہان کی مدت ملازمت میں اضافے کو تنقید کا نشانہ بنایا ہے۔ قومی اسمبلی میں گفتگو کرتے ہوئے قائد حزبِ اختلاف عمر ایوب نے کہا کہ سروس چیفس کی مدتِ ملازمت میں توسیع ’ملک اور مسلح افواج کے لیے اچھی خبر نہیں‘ اور اس سے کئی افسران کی حق تلفی ہوگی۔

انھوں نے متنبہ کیا تھا کہ یہی قانون سازی کل وزیرِ اعظم شہاز شریف کے خلاف بھی استعمال ہو سکتی ہے۔

پی ٹی آئی کے چیئرمین بیرسٹر گوہر بھی اس معاملے پر حکومت کو تنقید کا نشانہ بناتے ہوئے نظر آئے۔ انھوں نے کہا کہ جس طریقے سے قانون سازی کی گئی ہے ’وہ غلط ہے۔‘

26ویں آئینی ترمیم کے معاملے میں حکومت کی اتحادی جماعت جمعیت علمائے اسلام کے سربراہ مولانا فضل الرحمن نے 4 نومبر کو اسلام آباد میں پریس کانفرنس کرتے ہوئے کہا تھا کہ ’آرمی چیف کی مدت ملازمت میں اضافہ کرنا یا توسیع دینا انتظامی معاملات ہوتے ہیں، یہ ہر حکومت میں دیے گئے ہیں، گو کہ میں ذاتی طور پر اس کے حق میں نہیں ہوں لیکن پھر بھی یہ ایک انتظامی معاملہ ہے، ہر حکومت اپنے اختیار کے تحت یہ فیصلہ کر سکتی ہے۔‘

ان کا مزید کہنا تھا کہ ’کیا یہ آئین کا تقاضہ ہو گا کہ کل آپ نے 26ویں آئینی ترمیم میں وہ سب کردار واپس لے لیے جن سے ہماری مسلح افواج کو سول کے اندر اختیارات میں اضافہ مل رہا تھا، آج دوسری جانب سے ایکٹ پاس کرکے اپنے ہی اُس عمل کی نفی کی گئی ہے۔‘

مولانا کا کہنا تھا کہ ’یہ آئین کی توہین ہے، آئین کی 26ویں ترمیم کی توہین ہے، پارلیمنٹ کی توہین ہے۔‘

اس صورتحال میں جب عسکری امور میں دلچسپی رکھنے والے افراد سے فوج کے معاملات پر گفتگو کی جائے تو سیاسی پہلو بھی ضرور گفتگو کا حصہ بن جاتے ہیں۔

شجاع نواز کے مطابق ’پاکستان کا سیاسی ماحول ایسا ہے کہ فوج کے سربراہ کی مدتِ ملازمت کے پیچھے وجوہات کے حوالے سے شکوک و شبہات کا اظہار کیا ہی جاتا رہے گا۔‘

مدتِ ملازمت کے سیاسی پہلو پر تبصرہ کرتے ہوئے لیفٹننٹ جنرل ریٹائرڈ خالد نعیم لودھی کہتے ہیں کہ ’اب ہر حکومت کو ایک ہی آرمی چیف مقرر کرنا ہو گا۔ ہر بار جب بھی فوج کا سربراہ تعینات کرنا ہوتا ہے تو فوج اور سیاسی حکومت کے درمیان ایک تناؤ پیدا ہوجاتا ہے۔‘

'اس اقدام کی اچھائی یہ ہے کہ اب دو دفعہ نہیں بلکہ ایک ہی مرتبہ تناؤ پیدا ہو گا اور پھر شاید ایک استحکام ہو گا۔'

پاکستان کے وزیرِ دفاع خواجہ آصف نے بھی گذشتہ دنوں Uses in Urdu کو بتایا تھا کہ فوج کے سربراہ جنرل عاصم منیر نومبر 2027 تک اپنے عہدے پر موجود رہیں گے جس سے 'نظام کو تسلسل ملے گا۔'

ایک انٹرویو میں ان کا یہ بھی کہنا تھا کہ 'ایکسٹینشن والا سلسلہ ہم نے ختم کر دیا ہے۔'

تاہم سابق لیفٹننٹ جنرل خالد نعیم لودھی وزیرِ دفاع کے اس بیان سے اتفاق نہیں کرتے اور کہتے ہیں کہ 'میں نہیں سمجھتا کہ انھوں نے یہ درست بات کی ہے، ایک اس کا (قانون میں) ذکر نہیں ہے۔ ہونا یہ چاہیے تھا کہ آپ کی مدتِ ملازمت پانچ سال ہو گئی ہے اور اس کے بعد اس میں کوئی توسیع نہیں جائے گی۔'