روس کے گارڈز ہمیں اذیت دے کر خوش ہوتے تھے: یوکرینی جنگی قیدی جو ایک سال تک حراست میں خاموش رہا

’مجھے یہ جان کر بہت تکلیف ہوئی کہ مجھے روس کی قید سے باہر نکالنے کے لیے کتنے سارے لوگوں نے اتنا وقت لگا کر اور اتنی کوششیں کیں۔‘

22 سالہ یوکرینی فوجی یوری گُلچُک دو برس سے زیادہ عرصے تک بطور جنگی قیدی روس کی قید میں رہے۔ انھوں نے اپریل 2022 سے ستمبر 2024 تک 30 مہینے روس کی قید میں گزارے اور اس دوران انھیں ایک جیل سے دوسرے جیل میں منتقل کیا جاتا رہا، جہاں انھیں تشدد اور غیرانسانی سلوک بھی سہنا پڑا۔

ان کا کہنا ہے کہ قید میں تقریباً ایک برس تک انھوں نے مکمل خاموش اختیار کیے رکھی اور اس کے سبب انھیں ذہنی اور جسمانی تحفظ حاصل ہوا۔

اپنی گھر واپسی کے بعد بھی وہ خاموش ہی رہے۔ رہائی کے بعد ان کی ویڈیو بھی انٹرنیٹ پر نظر آئی جس میں ان کی والدہ میلانا انھیں سینے سے لگا رہی ہیں اور ان کا چہرہ چوم رہی ہیں۔

یوری کے منھ سے کچھ الفاظ سُننے کے لیے میلانا بار بار انھیں یہ باور کرواتی رہیں کہ ’ہم تم سے پیار کرتے ہیں، ہم تم سے پیار کرتے ہیں۔‘

بعد میں اپنی خاموشی کی وضاحت کرتے ہوئے یوری نے کہا کہ وہ اس وقت بات کرنے کی حالت میں نہیں تھے۔

رہائی کے بعد ان کی والدہ نے ان کی زبان سے جو پہلے جملے سُنے وہ یہ تھے: ’لوگ ایک دوسرے پر اتنا ظلم کیوں کرتے ہیں؟ یہاں اتنی تکلیف کیوں ہے؟‘

تاریخی دن

یوری نے یوکرینی مرینز میں شمولیت 24 جنوری 2022 کو یوکرین پر روسی حملے سے صرف دو ہفتوں پہلے اختیار کی تھی۔ اس دن یوری یوکرینی شہر مروپل میں تھے۔

وہ کہتے ہیں کہ ’ہم جب سو کر اُٹھے تو ہم نے ایک زوردار آواز سُنی۔ گراؤنڈ فلور پر کھڑکیاں ٹوٹی ہوئی تھیں۔ ہم سمجھے یہ دھماکے کی آواز قریب محاذ سے آئی ہے۔‘

لیکن کچھ گھنٹوں بعد یہ بات واضح ہو گئی کہ ایک باقاعدہ جنگ کا آغاز ہو چکا ہے۔

یوری کہتے ہیں کہ ’میں سوچ رہا تھا کہ تاریخ کی کتابوں میں لکھا جائے کہ اس سب کی شروعات مروپل میں اس دن ہوئی تھی، اور میں اس دن مروپل میں ہی موجود تھا۔‘

یوری کہتے ہیں اس وقت سب ’عجیب سا لگ رہا تھا۔‘

یوری یہی سوچ رہے تھے کہ ان کے ساتھ کوئی مذاق کیا جا رہا ہے لیکن جب انھوں نے اپنی والدہ اور دیگر اہلخانہ کو اپنا انتظار کرتے اور مسکراتے ہوئے دیکھا تب ہی انھیں یقین آیا کہ یہ خواب نہیں بلکہ ایک حقیقت ہے۔

زندگی کی طرف واپسی

اپنی رہائی اور اہلخانہ کے پاس واپسی کے بعد ابتدائی طور پر یوری کچھ بھی بولنے سے قاصر رہے۔

وہ کہتے ہیں کہ ’بولنے کے لیے یہ صرف گلے کے استعمال کا معاملہ نہیں تھا۔ بلکہ دوبارہ بات کرنے کے لیے، گُنگنانے کے لیے یا چیخنے کے لیے مجھے اپنے دماغ کو راضی کرنا تھا کیونکہ وہ بہت کمزور ہو چکا تھا۔ مجھے اُسے دوبارہ زندہ کرنے کی ضرورت تھی۔‘

خود کو اس بات کا یقین دلانے کے لیے کہ وہ آزاد ہیں یوری کو کئی دن لگ گئے۔

یوری کہتے ہیں وہ تمام فلمیں جو ان کی قید کے دوران ریلیز ہوئیں وہ دیکھنا چاہتے ہیں، نیا میوزک بھی سننا چاہتے ہیں اور ایک الیکٹرک بائیک بھی چلانا چاہتے ہیں۔

ان کا ارادہ ہے کہ وہ کیئو یونیورسٹی کا رُخ دوبارہ کریں جہاں وہ جنگ کی شروعات سے قبل پڑ رہے تھے۔

یوری کہتے ہیں کہ: ’میں خود کو سمجھاتا ہوں کہ میرا جو وقت قید میں گزرا وہ بالکل ضائع نہیں ہوا۔ شاید میں یہ خود کو تسلی دے رہا ہوں لیکن میں پھر بھی یہی کہنا چاہوں گا کہ میں نے اس سارے تجربے سے کچھ نہ کچھ سیکھا ہے۔‘

’میں خوش قسمت تھا جو بچ گیا، ہر کوئی اتنا خوش قسمت نہیں تھا۔‘