بچہ پیدا کرنے کے لیے مرد کا انتظار کیوں؟

نئے اعداد و شمار کے مطابق برطانیہ میں آئی وی ایف یا مصنوعی حمل کا استعمال کرنے والی خواتین کی تعداد ایک دہائی میں تین گنا سے زیادہ ہو گئی ہے۔

فرٹیلیٹی ریگولیٹر کی ایک رپورٹ سے پتہ چلتا ہے کہ سنہ 2012 اور 2022 کے درمیان ایسی خواتین کی تعداد 1,400 سے بڑھ کر 4,800 ہو گئی ہے۔

ماہرین اور ’سنگل پیرنٹ‘ خواتین، یعنی جو شوہر کے بغیر تنہا بچے پیدا کرنا چاہتی ہیں، کے مطابق اچھا ساتھی نہ ملنے کے ساتھ ساتھ زیادہ عمر بھی ان عوامل میں شامل ہے جس کی وجہ سے آئی وی ایف کے انتخاب میں اضافہ ہو رہا ہے۔ تاہم ایسی خواتین کو چند رکاوٹوں اور مسائل کا سامنا ضرور کرنا پڑتا ہے۔

ہم نے چند ایسی ہی ماؤں سے ان کے تجربات کے متعلق بات کی ہے جنھوں نے اکیلے خاندان شروع کرنے کا فیصلہ کیا۔

’کیوں کسی مرد کا انتظار کریں‘

جینا بتاتی ہیں کہ جب وہ 30 کی دہائی کے وسط میں تھیں تو انھوں نے اپنے ماں بننے کے امکان کی جانچ کرائی تھی اور اس وقت ہی پہلی بار انھوں نے ’سنجیدگی سے‘ سنگل ماں بننے کے بارے میں سوچنا شروع کیا۔

انھیں یاد ہے کہ ٹیسٹ کے نتائج آنے کے بعد انھوں نے خود سے کہا تھا کہ ’میری تولیدی صحت میری عمر کے اعتبار سے اچھی ہے۔۔۔ اور اب مجھے وہ کرنا چاہیے جو میں چاہتی ہوں۔‘

انھوں نے مزید کہا کہ ’مجھے ایسا لگتا تھا کہ میں کسی کے ساتھ طویل عرصے تک تعلق میں رہنے کے بجائے یہ کام خود کروں۔‘

انھوں نے ایک ڈونر یعنی عطیہ کیے جانے والے سپرم کا استعمال کرتے ہوئے انٹرا یوٹیرائن انسیمینیشن (آئی یو آئی) کروایا۔ یہ حمل ٹھہرانے کا ایک طریقہ ہے جس میں سپرم کو براہ راست رحم میں داخل کیا جاتا ہے۔ اس علاج کی قیمت تقریباً 1500 پاؤنڈ آئی تھی اور اس طرح سنہ 2021 میں وہ حاملہ ہو گئیں۔

اس دوران ان کی بہن اور والدہ نے ان کا بھرپور ساتھ دیا اور بچے کی پرورش میں بھی ہاتھ بٹایا۔ شاید یہی وجہ ہے کہ ان کے مطابق انھیں کوئی پریشانی نہیں ہوئی۔

سنہ 2022 میں پیدا ہونے والا ان کا بیٹا اب دو سال کا ہے۔ تاہم انھوں نے اعتراف کیا کہ ’مشکل لمحات بھی آتے ہیں۔ لیکن اگر آپ اپنی زندگی میں ایسے مقام پر ہیں جہاں اردگرد موجود لوگوں سے آپ کو پیار اور مدد مل رہی ہے تو پھر آپ کیوں کسی مرد کا انتظار کریں؟‘

یہ بھی پڑھیں: کوبرا سانپ کے گوشت کے شوقین، دانتوں کی صفائی نہ کرنے والے، اور عوام کے خوف میں مبتلا آمروں کی دلچسپ کہانیاں

’کبھی بھی ماں نہ بننے کا خوف‘

سوفی بتاتی ہیں کہ انہوں نے اپنی زندگی کا زیادہ تر حصہ 'مکمل، پرجوش، اور خوشگوار زندگی' کے طور پر گزارا۔ لیکن جب وہ 40 کی طرف بڑھنے لگیں تو ان میں کبھی بھی ماں نہ بننے کا خوف پیدا ہونے لگا۔

وہ بتاتی ہیں کہ 'آپ کو وقت کے ختم ہونے کا احساس ہونے لگتا ہے اور آپ نے جیسا چاہا تھا ویسا نہیں ہوتا۔'

انہوں نے ابتدائی طور پر آئی یو آئی کے ذریعے کوشش کی لیکن اسقاط حمل ہو گیا۔ اس کے بعد انہوں نے انڈوں کو منجمد کروایا اور آئی وی ایف کرانے کا فیصلہ کیا۔

سوفی نے اس مکمل عمل پر تقریباً 30,000 پاؤنڈ خرچ کیے اور وہ خود کو ایک تنہا والدین سمجھتی ہیں۔

رائل ایئرفورس میں کام کرنے والی سوفی بتاتی ہیں کہ حمل اور زچگی کے ابتدائی مراحل کے دوران انہیں 'واقعی کبھی گھبراہٹ نہیں ہوئی اور یقینی طور پر کوئی پچھتاوا نہیں۔'

کچھ لوگوں نے ان کے فیصلے پر سوال بھی کیا۔ کسی نے ان سے کہا کہ 'آپ ایک بچے کو دنیا میں لا رہی ہیں جس کا صرف ایک ہی والدین ہوگا۔'

سوفی کہتی ہیں کہ 'میں جانتی ہوں کہ مارٹھا تین سال کی ہونے والی ہے اور ہمارا سب سے خاص رشتہ ہے۔ انہیں بہت مستحکم زندگی ملی ہے۔'

اگرچہ انہوں نے مارٹھا کو بتا دیا ہے کہ وہ کس طرح حاملہ ہوئیں لیکن ان کا کہنا ہے کہ جیسے جیسے اس کی سمجھ بڑھتی جائے گی وہ مارٹھا کے ساتھ 'ہر چیز کے بارے میں کھل کر بات' کریں گی۔

لیکن انہوں نے اعتراف کیا کہ انہیں مشکلات کا سامنا بھی ہوا۔

انہوں نے کہا: 'آپ تمام فیصلے خود کر رہے ہیں، آپ تمام پریشانیاں خود اٹھا رہے ہیں، آپ کے پاس اپنے خیالات کو شیئر کرنے والا کوئی نہیں ہے لیکن۔۔۔ آپ کو احساس ہوتا ہے کہ آپ کتنے مضبوط ہیں جب بچہ بیمار ہوتا ہے اور آپ کو سونا بھی نصیب نہیں ہوتا۔'

یہ بھی پڑھیں: دہشتگردوں نے 60 سے زیادہ لوگوں کو موت کے گھاٹ اتار دیا، ذمہ داری انتہا پسند گروپ نے قبول کی، مصر میں سیاحتی سرگرمیاں معطل رہیں

'بچے محدود وقت کا رومانس نہیں ہوتے'

مشیل کا ماں بننے کا سفر آئی یو آئی کے ذریعے اس وقت شروع ہوا جب ان کا ایک شخص کے ساتھ رشتہ ختم ہوا تھا۔ انہوں نے سپرم ڈونر کی مدد سے یہ سفر شروع کیا۔

فرٹیلیٹی نیٹ ورک یو کے کی ڈاکٹر کیتھرین ہل نے بھی تنہا بچے کی پرورش میں مالی رکاوٹوں کا ذکر کیا ہے جس میں برطانیہ میں اوسطاً ہفتہ وار کل وقتی بچوں کی دیکھ بھال کے اخراجات سینکڑوں پاؤنڈز میں آتے ہیں۔

تاہم انھوں نے کہا کہ (اکیلی خواتین کے آئی وی ایف یا مصنوعی حمل کے انتخاب کے) اس رجحان میں اضافہ نظر آ رہا ہے۔'

انھوں نے مزید کہا کہ ’میرے خیال میں اکیلی ماؤں کے بارے میں سماجی رویہ بدل گیا ہے اور میں سمجھتی ہوں کہ اب پالیسیوں کو ان تبدیلیوں سے ہم آہنگ ہونے کی ضرورت ہے۔‘