بی بی سی کی 100 خواتین: ‘سیکس کی علامت’ کہلائی جانے والی اداکارہ جنہوں نے اپنی شہرت کو ایڈز کے خلاف استعمال کیا

جب میں نے شیرون سٹون سے سوال کیا کہ اگر انھیں موقع ملے کہ وہ ایک نوجوان شیرون سٹون کو استقامت کے بارے میں پیغام دیں، تو ان کے ردعمل نے ہم دونوں کو حیران کر دیا۔

ہم سیاست، مصوری اور ہالی وڈ پر بات کر چکے تھے لیکن اچانک انھوں نے اپنا ہاتھ آنکھوں پر رکھ دیا اور طویل وقفہ لینے کے بعد رونا شروع کر دیا۔

'تم یہ کر لوں گی۔' 66 سالہ ہالی وڈ اداکارہ کہتی ہیں کہ وہ خود کو یہ پیغام دیں گی۔ اداکارہ، انسانی حقوق کی سرگرم کارکن، مصنفہ اور پروڈیوسر جو اب ایک مصورہ بھی ہیں ان لمحات کو یاد کرتی ہیں جب برین ہیموریج نے 23 سال قبل ان کی زندگی تقریباً ختم کر دی تھی۔

شیرون نے دہرایا کہ 'تم نہیں جانتی لیکن تم اس سب سے گزر جاؤ گی۔ میں اس پیغام کو اپنے آنکھوں کی پلکوں پر چھپوا لیتی۔'

انھوں نے اس وقت کو یاد کرتے ہوئے کہا کہ 'میں زمین پر گری ہوئی تھی اور ایمبولنس نہیں بلوا پا رہی تھی۔ جب میں ہسپتال سے گھر لوٹی تو میں نے میگزین میں پڑھا کہ 30 دن تک یہ معلوم نہیں تھا کہ میں زندہ رہوں گی یا مر جاؤں گی۔'

ان کی خون کی ایک شریان پھٹ چکی تھی جس کی وجہ سے دماغ میں خون بہنے سے سٹروک ہوا۔ وہ کہتی ہیں کہ ان کے زندہ بچنے کا ایک فیصد امکان بتایا گیا تھا اور انھیں چلنا پھرنا اور بولنا دوبارہ سے سیکھنا پڑا۔

شیرون نے ان تمام مشکلات کو گنوایا جن کا انھیں سامنا کرنا پڑا جن میں معاشی مشکلات سمیت اپنے سابق شوہر سے گود لیے جانے والے بچے کی کفالت کا عدالتی جھگڑا بھی شامل تھا۔

میرے سوال تک شیرون نے وضاحت دی کہ انھوں نے اس بات پر یقین نہیں کیا تھا کہ وہ اس سب سے گزر چکی ہیں۔ 'بہت وقت ہو چکا ہے اور سب ٹھیک ہے، اب ہر کوئی ساحل تک پہنچ چکا ہے۔'

اس سال Uses in Urdu ورلڈ سروس کی 100 خواتین کا عنوان 'استقامت' ہے اور جب شیرون کو میں نے بتایا کہ وہ بھی اس فہرست میں شامل ہیں تو ان کا چہرہ چمک اٹھا۔

1992 میں 'بیسک انسٹنکٹ' نامی ایروٹک فلم سے شہرت کی بلندیوں کو چھونے والی شیرون سٹون کو 'سیکس کی علامت' سمجھ لیا گیا تھا لیکن انھوں نے اپنی شہرت کو ایچ آئی وی اور ایڈز جیسی بیماریوں پر تحقیق کے لیے عطیات حاصل کرنے کے لیے استعمال کیا۔

وہ کہتی ہیں کہ 'مجھے اس بات پر فخر ہے کہ اس فلم میں میرا جو تصور تھا، کہ میں بہت سیکسی ہوں، اسے میں نے ایک ایسی بیماری کے خلاف جنگ میں استعمال کیا جس سے متاثرہ لوگ اپنی جنسی خواہشات کی وجہ سے سزا پا رہے تھے، کیوں کہ مجھے بھی سزا مل رہی تھی۔'

2013 میں ایچ آئی وی اور ایڈز کے خلاف کام کی وجہ سے شیرون سٹون کو نوبل امن سمٹ ایوارڈ سے نوازا گیا۔ یہ ایوارڈ نوبل امن انعام پانے والے ثقافتی اور انٹرٹینمنٹ کی دنیا کی ان شخصیات کو دیتے ہیں جو معاشی انصاف اور امن کے لیے خدمات سرانجام دیتے ہیں۔

میں نے شیرون سے سوال کیا کہ ان کے نزدیک ’استقامت‘ کیا ہے۔ انھوں نے جواب دیا کہ ’اپنی مرضی سے چننے کا حق کہ اگر ہمیں تکلیف یا خوشی میں سے کچھ چننا ہو تو ہم خوشی کو ہی چنتیں رہیں۔ اپنے موجود میں حاضر رہنا۔ اگر آپ گر جائیں تو اٹھ کھڑے ہونا۔ کوئی آپ کو دھکا دے اور پھر اب مدد کرنا چاہے تو انھیں اس کی اجازت دیں۔‘

انٹرویو ختم ہونے کے قریب تھا تو ان کا میک اپ دوبارہ سے کیا گیا۔ انھوں نے پانی پیا، پھر اٹھ کر مجھے گلے لگایا اور ایک نوجوان شیرن کو پیغام دینے کے سوال پر شکریہ ادا کرتے ہوئے کہا کہ ’وہ بہت گہرا سوال تھا۔‘