شاید اب پی ٹی آئی کبھی بھی احتجاج کی کال نہ دے سکے ، رانا ثنا اللہ

رانا ثنا اللہ کا پی ٹی آئی پر تنقید

اسلام آباد(ڈیلی پاکستان آن لائن) مسلم لیگ ن کے رہنما اور وزیراعظم کے مشیر رانا ثنا اللہ نے تحریک انصاف کو تنقید کا نشانہ بناتے ہوئے کہا کہ پی ٹی آئی نے ہمیشہ ریاست کے خلاف پروپیگنڈا کیا، اس کی قیادت معصوم لوگوں کو ورغلا کر احتجاج میں لائی۔

یہ بھی پڑھیں: بانی پی ٹی آئی سے علی امین گنڈاپور کی اڈیالہ جیل میں 2گھنٹے ملاقات

احتجاج میں بےقاعدگی

جیو نیوز کے پروگرام میں گفتگو کرتے ہوئے رانا ثنا اللہ نے کہا کہ پختونوں سے متعلق پی ٹی آئی پروپیگنڈا کر رہی ہے۔ احتجاج کے دوران خیبرپختونخوا سے 15 سے 20 ہزار کے قریب مسلح لوگ اسلام آباد لائے گئے، جو لوگ گمراہ کرکے خیبرپختونخوا سے مسلح جتھے لائے، وہ ذمہ دار ہیں۔ رانا ثنا اللہ کا کہنا تھا کہ احتجاج کے دوران قانون نافذ کرنے والے اداروں کے ڈھائی سو کے قریب اہلکار زخمی ہوئے، سیدھی گولیاں پی ٹی آئی والوں نے ماری ہیں۔ جو لوگ پورے معاشرے کو تکلیف دیتے ہیں ان کا بھی احتساب ہونا چاہیے۔

مذاکرات کی پیشکش

انہوں نے کہا کہ احتجاج سے متعلق پی ٹی آئی کا کوئی انتظام نہیں تھا، وہاں ان کا رکنا مشکل تھا۔ تحریک انصاف کی قیادت معصوم لوگوں کو ورغلا کر احتجاج میں لائی۔ رانا ثنا اللہ کا کہنا تھا کہ پی ٹی آئی اب اتنی جلدی دوبارہ احتجاج کی پوزیشن میں نہیں آئے گی، شاید اب پی ٹی آئی کبھی بھی احتجاج کی کال نہ دے سکے۔ ہم پہلے بھی ان کے ساتھ مذاکرات کیلئے تیار تھے، آج بھی ہیں۔ وزیراعظم نے ان کو مذاکرات کی دعوت دی لیکن انہوں نے انکار کیا۔