عمران خان اوورسیز پاکستانیوں کے ذریعے سول نافرمانی اور بائیکاٹ تحریک سے کیا مقصد رکھتے ہیں؟

سابق وزیراعظم عمران خان کے ایکس اکاؤنٹ سے گذشتہ شب جاری پیغام میں پاکستان تحریکِ انصاف (پی ٹی آئی) کے سیاسی قیدیوں کی رہائی اور نو مئی اور 26 نومبر کے واقعات کی شفاف تحقیقات کے لیے جوڈیشل کمیشن کے قیام کا مطالبہ کیا گیا ہے۔ اس کے علاوہ مطالبات نہ ماننے کی صورت میں 14 دسمبر سے سول نافرمانی کی تحریک اور بائیکاٹ مہم کا اعلان بھی کیا گیا ہے۔

بیان میں بتایا گیا ہے کہ سول نافرمانی کی تحریک دو مراحل پر مشتمل ہو گی۔ پہلے مرحلے میں ’بیرونِ ملک مقیم پاکستانیوں سے اپیل کی جائے گی کہ وہ ترسیلاتِ زر کو محدود کریں اور بائیکاٹ مہم چلائیں‘، جبکہ دوسرے مرحلے میں ’اس سے بھی آگے جائیں گے۔‘

عمران خان کے اکاؤنٹ سے جاری ہونے والا یہ بیان اس وقت آیا ہے جب جمعرات کو ان پر جی ایچ کیو حملہ کیس میں فردِ جرم عائد کی گئی تھی۔

دوسری جانب بیان میں ’سٹیک ہولڈرز سے‘ مذاکرات کرنے کی بات بھی کی گئی ہے، جس کے لیے تشکیل دی گئی کمیٹی میں عمر ایوب خان، علی امین گنڈاپور، صاحبزادہ حامد رضا، سلمان اکرم راجہ اور اسد قیصر شامل ہوں گے۔

خیال رہے کہ گذشتہ روز اپوزیشن لیڈر عمر ایوب سمیت دیگر پی ٹی آئی رہنماؤں کو اڈیالہ جیل کے باہر سے گرفتار کیا گیا تھا۔

یہ پہلی مرتبہ نہیں ہے کہ عمران خان کی جانب سے سول نافرمانی کی تحریک چلانے اور بیرونِ ملک مقیم پاکستانیوں سے کہا جائے کہ وہ ترصیلاتِ زر ملک میں نہ بھیجیں۔ اس سے قبل سنہ 2014 کے اسلام آباد دھرنے کے دوران بھی عمران خان کی طرف سے سول نافرمانی کی تحریک چلانے کا اعلان کیا گیا تھا، تاہم یہ ناکام رہی تھی۔

تو ایک جانب جہاں اس بیان میں بظاہر ماضی قریب میں تحریکِ انصاف کی حکمتِ عملی تبدیل کرتے ہوئے مطالبات نہ ماننے کی صورت میں احتجاج نہیں بلکہ سول نافرمانی کی تحریک اور بائیکاٹ مہم کی بات کی گئی ہے، وہیں مذاکرات بھی کرنے پر زور دیا گیا ہے۔

مذاکرات کس سے کیے جائیں گے؟ یہ ایک سوال ہے جس پر تحریکِ انصاف کی طرف سے ماضی میں متضاد بیانات دیے جاتے رہے ہیں۔

ملک میں سیاسی تناؤ کی صورتحال کے بیچ عمران خان کے اکاؤنٹ سے جاری کیے گئے اس بیان نے متعدد سوالات کو جنم دیا ہے۔ لیکن سب سے پہلے جانتے ہیں کہ پیغام میں کیا کہا گیا ہے۔

سول نافرمانی کی تحریک کس کے خلاف اور مذاکرات کس سے؟

سابق وزیراعظم عمران خان کے ایکس اکاؤنٹ سے گذشتہ شب پیغام جاری کیا گیا ہے۔

پیغام میں سیاسی قیدیوں کی رہائی اور نو مئی اور 26 نومبر کے واقعات کی شفاف تحقیقات کے لیے جوڈیشل کمیشن کے قیام کا مطالبہ کیا گیا ہے، اور مطالبات نہ ماننے کی صورت میں 14 دسمبر سے سول نافرمانی کی تحریک اور بائیکاٹ مہم کا اعلان کیا گیا ہے۔

تاہم انھوں نے الزام عائد کیا کہ 'حکومت غیرسنجیدہ ہے، ان کے وزرا غیرسنجیدہ ہیں اور ان کے پاس کوئی اختیار بھی نہیں ہے۔'

'اس لیے ہم کہتے ہیں کہ ہم مذاکرات بااختیار لوگوں کے ساتھ کرنا چاہتے ہیں۔'

یہ بھی پڑھیں: ٹرمپ کے سیاسی سفر پر ایک نظر،پہلا دورِاقتدار تنازعات سے بھرپور رہا

سول نافرمانی اور بائیکاٹ مہم سے کیا مطلب ہے؟

یاد رہے کہ اگست 2014 میں اسلام آباد میں حکومت کے خلاف لانگ مارچ کے بعد دھرنا دینے والے تحریک انصاف کے بانی عمران خان نے اس وقت سول نافرمانی کی تحریک کا اعلان کرتے ہوئے اس وقت کے وزیراعظم نوازشریف کو مستعفیٰ ہونے کے لیے دو دن کی مہلت دی تھی۔

عمران خان نے اس وقت اسے اپنی زندگی کی سب سے اہم تقریر قرار دیتے ہوئے کہا تھا کہ ’ہم سول نافرمانی کی مہم شروع کریں گے اور جب تک نوازشریف استعفیٰ نہیں دیتے، ہم ٹیکس نہیں دیں گے کیونکہ اگر ہم نے ٹیکس ادا کیا تو یہ کرپٹ حکمران اسے کھا جائیں گے۔‘

’آج سے میں نہ ٹیکس دوں گا، نہ بجلی اور گیس کے بل دوں گا۔ اگر آپ نے اپنے آپ کو اس بدعنوان وزیراعظم سے بچانا ہے تو ہمیں یہ فیصلہ کرنا ہوگا۔‘

یہ کہتے ہوئے انھوں نے خطاب کے دوران ہی بظاہر بجلی کا بل جلا دیا تھا۔

تاہم نہ تو یہ تحریک کامیاب ہوئی تھی اور نہ ہی اس وقت کے وزیرِ اعظم نواز شریف مستعفی ہوئے تھے بلکہ تحریکِ انصاف کو ایک طویل دھرنا دینے کے بعد اسے آرمی پبلک سکول حملے کے بعد ختم کرنا پڑا تھا۔

حامد رضا نے اے آر وائے کے پروگرام الیونتھ آور میں بات کرتے ہوئے کہا کہ ’سول نافرمانی کی تحریک کوئی نئی چیز نہیں ہے، قیامِ پاکستان سے پہلے بھی یہ جاری رہی ہیں، سنہ 2014 میں بھی اثر ہوا تھا اور آج بھی ہو گا کیونکہ آج عمران خان کی مقبولیت بہت زیادہ ہے۔‘

عمران خان کے ایکس اکاؤنٹ سے شیئر کی گئی ٹویٹ میں 'بائیکاٹ مہم' کا بھی ذکر کیا گیا ہے تاہم واضح نہیں کیا گیا کہ یہ مہم کس کے خلاف چلائی جائے گی۔

عمران خان کی بہن علیمہ خان نے اڈیالہ جیل کے باہر میڈیا سے گفتگو کرتے ہوئے کہا کہ عمران خان نے کہا ہے کہ 'اگر مطالبات پورے نہ ہوں تو بیرونِ ملک مقیم پاکستانی ملک میں ترسیلاتِ زر بھیجنا بند کر دیں۔'

انھوں نے کہا کہ 'یہ نظام جو آپ سمجھ رہے ہیں کہ آئی ایم ایف پر چل رہا ہے، نہیں یہ اوورسیز پاکستانیوں کی محنت کی کمائی کی وجہ سے چل رہا ہے۔'

ڈاکٹر علی حسنین کے مطابق اگر ترسیلاتِ زر میں واقعی کوئی کمی آتی ہے تو اس سے ’حکومت کی درآمدات پر پیسے خرچ کرنے اور قرضے اتارنے کی صلاحیتوں پر فرق پڑ سکتا ہے۔‘

تاہم ان کے خیال میں ترسیلاتِ زر کی کمی کی صورت میں حکومت پر پڑنے والا اثر یا فرق زیادہ بڑا نہیں ہوگا۔

ان کے مطابق حکومت روپے کی قدر کو کم کر کے ایسے کسی بھی اثر کو روک سکتی ہے اور اس سے درآمدات اور برآمدات پر حکومت کا کنٹرول برقرار رہے گا۔

ان کا کہنا ہے کہ روپے کی قدر مزید کم ہونے سے پاکستان میں ترسیلات زر کی قدر اور بھی زیادہ نمایاں ہوجائے گی۔