پنجاب کیلئے بڑاعالمی اعزاز، سال 2027 ء کیلئے لاہور ”ای سی او“ کا سیاحتی دارالحکومت نامزد

لاہور کو 'ای سی او' کا سیاحتی دارالحکومت نامزد کیا گیا

لاہور (ڈیلی پاکستان آن لائن) پاکستان اور صوبہ پنجاب کے لیے بڑا عالمی اعزاز، سال 2027 ء کے لیے لاہور "ای سی او" کا سیاحتی دارالحکومت نامزد کر دیا گیا۔ 10 ممالک کی معاشی تعاون تنظیم (ای سی او) کا 25 رکنی وفد 13 اپریل سے لاہور کا دورہ شروع کرے گا اور لاہور شہر کو باضابطہ طور پر "ای سی او" کیپٹل ٹورازم نامزد کرنے کا اعلان ہوگا۔ ازبکستان کے شہر سبز کو یہ اعزاز پہلے مل چکا ہے، ترکیہ کے مشرقی اناطولیہ کے شہر اَذرُوم کو 2025 ء کے لیے "ای سی او کیپٹل ٹورازم" نامزد کیا گیا ہے۔

یہ بھی پڑھیں: کیا خراب پڑوسیوں کے تعلقات بھارت کو افغان طالبان کی طرف دھکیل رہے ہیں؟

عالمی وفد کا دورہ

وزیراعلیٰ پنجاب مریم نواز کی دعوت پر "اکنامک کوآرڈینیشن آرگنائزیشن" کے سفیر لاہور آرہے ہیں۔ ای سی او میں ترکیہ، ایران، افغانستان، پاکستان کے علاوہ آذربائیجان، قزاقستان، کرغزستان، تاجکستان، ترکمانستان اور ازبکستان کے ممالک شامل ہیں۔ ای سی او ہر سال 10 میں سے ایک رُکن ملک کے شہر کو اس منفرد اعزاز کے لیے منتخب کرتا ہے۔ لاہور کو اس کے بھرپور تاریخی، ثقافتی اور سیاحتی ورثے کے پس منظر میں یہ اعزاز دیا جارہا ہے۔ 2019 میں شروع ہونے والے اس سلسلے کا مقصد ای سی او خطے کے تاریخی، ثقافتی و سیاحتی ورثے اور خوبصورتی کو دنیا بھر میں اجاگر کرنا ہے۔

یہ بھی پڑھیں: سندھ میں پولیو کے مزید 2 کیسز رپورٹ، رواں سال تعداد 12 ہوگئی

اجلاس اور تقریبات

وزیراعلیٰ پنجاب کی میزبانی میں 'ای سی او' کی مستقل مندوبین کونسل کا اجلاس سول سیکریٹریٹ میں ہوگا۔ "ای سی او" ممالک کا وفد میلہ چراغاں دیکھنے کے علاوہ، والڈ سٹی سمیت دیگر تاریخی مقامات اور سیف سٹیز اتھارٹی کا دورہ کرے گا۔ وفد کے اعزاز میں گورنر ہاؤس میں ظہرانہ بھی ہوگا۔

ثقافتی ورثے کی اہمیت

سینئر صوبائی وزیر مریم اورنگزیب نے کہا کہ لاہور کو "ای سی او کیپٹل ٹورازم" کا اعزاز ملنا ہماری تاریخ، ثقافت اور قومی ورثہ کے فروغ کے حوالے سے بڑی پیش رفت ہے جس کا خیر مقدم کرتے ہیں۔ وزیراعلیٰ مریم نواز لاہور کے تاریخی، تہذیبی، ثقافتی رنگ دنیا کو دکھانا چاہتی ہیں۔ لاہور کا 'ای سی او کیپٹل ٹورازم' نامزد ہونا ملک اور صوبے میں عالمی سیاحت کے فروغ کی طرف اہم قدم ثابت ہوگا۔