شہری نے اپنی ہی چوری شدہ گاڑی کو انجانے میں دوبارہ خرید لیا

لندن (ویب ڈیسک) برطانیہ میں ایک دلچسپ اور حیران کن واقعہ پیش آیا ہے جہاں ایک شخص نے انجانے میں اپنی ہی چوری شدہ گاڑی دوبارہ خرید لی۔​

چوری کا واقعہ

ایکسپریس نیوز کے مطابق 36 سالہ ایوان ویلنٹائن، جو کہ سولیہل، ویسٹ مڈلینڈز کے رہائشی اور سافٹ ویئر انجینئر ہیں، کی 2016 ماڈل بلیک ہونڈا سیوک ٹائپ-آر فروری 2025 میں ان کے گھر کے ڈرائیو وے سے چوری ہو گئی تھی۔ پولیس کو اطلاع دینے پر انہیں بتایا گیا کہ گاڑی کی بازیابی کے امکانات کم ہیں۔​

نئے متبادل کی تلاش

ان کی انشورنس کمپنی نے نقصان کی تلافی کے لیے رقم ادا کی جس کے بعد ایوان نے ایک متبادل گاڑی کی تلاش شروع کی۔ کچھ ہفتوں بعد انہوں نے تقریباً 70 میل دور ایک کار شوروم سے بالکل ویسی ہی گاڑی خریدی جو ظاہری طور پر ان کی چوری شدہ گاڑی جیسی تھی۔

عجیب مشاہدات

انہوں نے اس گاڑی کے لیے 26 ہزار ڈالرز سے زائد ادا کیے۔ تاہم گاڑی خریدنے کے بعد ایوان نے کچھ عجیب مشاہدات کیے، مثلاً گاڑی کے اندر کرسمس ٹری کی سوئیاں اور مارس بار کے ریپرز موجود تھے، جو ان کی پچھلی گاڑی میں بھی تھے۔ٹینٹ پیگ جیسی چیزیں بھی گاڑی میں پائی گئیں، جو ان کی پرانی گاڑی میں تھیں۔

حقیقت کی تصدیق

گاڑی کے نیویگیشن سسٹم میں ان کا اپنا اور ان کے والدین کا پتہ محفوظ تھا۔​ان مشاہدات کے بعد انہوں نے گاڑی کو ہونڈا کے ایک ورکشاپ میں لے جا کر چیک کروایا جہاں تصدیق ہوئی کہ یہ وہی گاڑی ہے جو ان سے چوری ہوئی تھی۔​