بھارت جتنی طاقت استعمال کرے گا، ہم اس سے زیادہ طاقت سے جواب دیں گے، خواجہ آصف

اسلام آباد(ڈیلی پاکستان آن لائن) وزیر دفاع خواجہ آصف نے کہا ہے کہ جیسے جیسے وقت گزر رہا ہے، حملے کے خطرات بڑھ رہے ہیں۔ انہوں نے یہ بات پارلیمنٹ ہاؤس کے باہر میڈیا سے گفتگو کرتے ہوئے کہی۔

وزیر دفاع خواجہ اصف نے کہا کہ اگر بھارت نے حملہ کیا تو ہم نے جواب دینا ہے۔ ان کا کہنا ہے کہ بھارت جتنی طاقت استعمال کرے گا، اس سے زیادہ طاقتور جواب دیں گے۔ کسی کو بھی شک نہیں ہونا چاہیے کہ ہم بھارت کو بھرپور جواب دیں گے۔

خواجہ آصف نے بتایا کہ دوست ممالک اور خطے کی بڑی طاقتیں بھی اس صورت حال میں ثالثی کا کردار ادا کر رہی ہیں۔ انہوں نے کہا کہ ان ممالک کی کوششیں ہمیں اس امید کی طرف لے جا سکتی ہیں کہ بھارت کو کچھ عقل آئے گی۔

وزیر دفاع نے مزید کہا کہ شہباز شریف نے واضح کیا ہے کہ معاملے کی بین الاقوامی سطح پر تحقیقات کروائی جائیں۔ بھارت نے عالمی تحقیقات کے مطالبے پر کوئی جواب نہیں دیا، جس کا مطلب یہ ہے کہ معاملے میں کچھ نہ کچھ ضرور ہے۔

خواجہ آصف نے یہ واضح کیا کہ ہماری طرف سے جنگ کا آغاز نہیں ہوگا، لیکن اگر جنگ مسلط کی گئی تو ہم بھرپور جواب دیں گے۔