بھارت کا پاکستان سے شپنگ اور پوسٹل روابط بھی معطل کرنے پر غور

بھارت کی نئی چال: شپنگ اور پوسٹل روابط کی معطلی

نئی دہلی (ویب ڈیسک) بھارت کا پاکستان کے خلاف ایک اور محاذ کھولنے کی تیاریاں، بھارتی میڈیا رپورٹس کے مطابق بھارت پاکستان کے ساتھ شپنگ اور پوسٹل روابط بھی معطل کرنے پر غور کررہا ہے۔

پاکستان کو مشکلات کا سامنا

نجی ٹی وی ایکسپریس نیوز کے مطابق حسب روایت بھارتی میڈیا شپنگ اور پوسٹل روابط کی معطلی سے پاکستان کے لیے مشکلات کا واویلہ کررہا ہے، وہیں شپنگ سیکٹر کے ماہرین کا کہنا ہے کہ پاکستان کے خلاف دیگر محاذوں کی طرح اس محاذ پر بھی بھارت کو منہ کی کھانی پڑے گی۔ پاکستان کے پرچم بردار کارگو بحری جہاز ملائشیا سے کارگو بھارت لے جانے کے لیے چارٹرڈ ہیں۔

پاکستانی بحری جہاز کی موجودگی

اس وقت پاکستانی پرچم بردار بحری جہاز سبی کلکتہ کی بندرگاہ پر موجود ہے، یہ جہاز 26 ہزار ٹن کوئلہ ملائیشیا سے لے کر بھارت پہنچا ہے، جبکہ دوسرا بحری جہاز چترال بجی مئی کے پہلے ہفتے میں ملائیشیا سے کارگو لے کر بھارت پہنچے گا۔

قانونی عواقب اور نقصان

پاکستانی فلیگ بردار جہازوں پر پابندی پر بھارت کو لندن میری ٹائم ثالثی ایسوسی ایشن میں گھسیٹا جا سکتا ہے۔ کسی بھی چارٹر معاہدے کی خلاف ورزی پر بھارت کے لیے شپنگ انشورنس بڑھ جائے گی، اور دیگر شپنگ لائنز سے چارٹر کرنا مشکل ہوگا۔

انڈو پاک میری ٹائم پروٹوکول کی معطلی

واضح رہے کہ بھارت انڈو پاک میری ٹائم پروٹوکول معطل کرنے پر غور کررہا ہے جو 2006 میں طے کیا گیا تھا۔