قرآن میرے سرہانے رہتا ہے، روحانی سکون کا ذریعہ ہے: ہالی ووڈ اداکار کا انکشاف

واشنگٹن (ڈیلی پاکستان آن لائن) نیٹ فلکس کی مشہور سیریز ’یو‘ میں جو گولڈبرگ کا کردار ادا کرنے والے امریکی اداکار پین بیجلی نے حالیہ انٹرویو میں اپنی روحانی زندگی کے متعلق دلچسپ اور متاثر کن انکشافات کئے ہیں۔

روحانیت کا سہارا

نجی ٹی وی ایکسپریس نیوز کے مطابق معروف جریدے یو ایس اے ٹوڈے سے گفتگو کرتے ہوئے بیجلی نے بتایا کہ وہ روزمرہ کی زندگی کے دباو سے نمٹنے کے لئے روحانیت کو اپنا سہارا بناتے ہیں۔ اداکار نے انکشاف کیا کہ ان کی بیڈ سائیڈ پر قرآن پاک ہر وقت موجود ہوتا ہے اور وہ اکثر اس کی آیات کا مطالعہ کرتے ہیں اور ان پر غور و فکر کرتے ہیں۔

مختلف مذاہب کی تعلیمات

پین بیجلی کا کہنا تھا کہ وہ صرف قرآن ہی نہیں بلکہ مختلف مذاہب کی روحانی کتابیں بھی پڑھتے ہیں تاکہ اپنی روح اور دل کو سکون فراہم کر سکیں۔ ان کا ماننا ہے کہ یہ مطالعہ انہیں زندگی کی گہرائی، مقصد اور توازن کا احساس دلاتا ہے۔

روزمرہ کے روحانی معمولات

انہوں نے مزید بتایا کہ ان کے روزمرہ معمولات میں بہائی مذہب کی معروف ’لانگ اوبلیگیٹری پریئر‘ یعنی طویل فرض نماز بھی شامل ہے، جسے وہ زبانی یاد کر چکے ہیں اور ہر دن کے آغاز میں ضرور پڑھتے ہیں، چاہے ان کا شیڈول کتنا ہی مصروف کیوں نہ ہو۔

مراقبہ کے لمحات

پین بیجلی نے کہا، "صبح کے وقت بچوں، کام اور دیگر ذمہ داریوں کے باعث وقت نکالنا مشکل ہوتا ہے، مگر میں روزانہ کم از کم 15 سے 20 منٹ روحانی مراقبے یا عبادت کے لئے ضرور نکالتا ہوں۔ یہی چند لمحے میرے لئے سکون اور زندگی کے اصل مقصد کی یاد دہانی بن جاتے ہیں۔"