چئیرپرسن پنجاب ویمن پروٹیکشن اتھارٹی باپ اور بھائیوں کے ہاتھوں قتل ہونیوالی لڑکی کے گھر پہنچ گئیں، ایسے سفاک جرائم پر خاموش نہیں بیٹھ سکتے: حنا پرویز بٹ
مقتولہ سدرہ کی اہل خانہ سے ملاقات
لاہور (ڈیلی پاکستان آن لائن) پنجاب ویمن پروٹیکشن اتھارٹی کی چیئرپرسن اور رکن پنجاب اسمبلی حنا پرویز بٹ نے لاہور کی گجر کالونی میں 16 سالہ مقتولہ سدرہ کے گھر جا کر اہل خانہ سے ملاقات کی اور اس دلخراش واقعے پر دلی رنج و غم کا اظہار کیا۔ انہوں نے مرحومہ کے اہل خانہ کو مکمل قانونی معاونت اور حکومتِ پنجاب کی جانب سے فوری انصاف کی فراہمی کی یقین دہانی کروائی۔
یہ بھی پڑھیں: خوراک کیلئے ترستی فلسطینی خاتون بچوں کو کچھوے پکا کر کھلانے پر مجبور
قتل کے واقعے کی تفصیلات
ایف آئی آر نمبر 2792/25 تھانہ کوٹ لکھپت میں درج کی گئی، جس کے مطابق سدرہ کو اس کے والد بشیر احمد نے اپنے بھائیوں محمد عمران اور جبار کے ساتھ مل کر گلا گھونٹ کر قتل کیا اور لاش کو چھپا کر اوڈھ محلہ قبرستان میں خفیہ طور پر دفنا دیا۔ پولیس نے کارروائی کرتے ہوئے تینوں ملزمان کو گرفتار کر لیا ہے اور ان کے خلاف دفعات 302، 201 اور 34 تعزیراتِ پاکستان کے تحت مقدمہ درج کر لیا گیا ہے۔
چیئرپرسن حنا پرویز بٹ کا بیان
اس موقع پر گفتگو کرتے ہوئے چیئرپرسن حنا پرویز بٹ نے کہا کہ یہ واقعہ انسانیت سوز اور انتہائی افسوسناک ہے۔ ہم ایسے سفاک جرائم پر خاموش نہیں بیٹھ سکتے۔ وزیراعلیٰ پنجاب مریم نواز کی واضح ہدایت ہے کہ خواتین اور بچیوں پر کسی بھی قسم کا تشدد ناقابل برداشت ہے۔ پنجاب ویمن پروٹیکشن اتھارٹی مظلوم خاندانوں کے ساتھ ہر قدم پر کھڑی ہے۔ متاثرہ خاندان کو قانونی، نفسیاتی اور فلاحی معاونت فراہم کی جائے گی تاکہ وہ اس صدمے سے باہر آ سکیں اور انہیں بروقت انصاف مل سکے۔
