اماراتی شیخ نے 1855 میں جاری ہونے والا برطانیہ کا تاریخی اخبار ٹیلی گراف خریدنے کا معاہدہ کرلیا

خریداری کا معاہدہ

لندن (ڈیلی پاکستان آن لائن) برطانوی اخبار ڈیلی اور سنڈے ٹیلی گراف کو بالآخر دو سال کی غیر یقینی صورتحال کے بعد ایک امریکی فرم ریڈ برڈ کیپٹل نے خریدنے کا معاہدہ کر لیا ہے۔ بی بی سی کے مطابق یہ خریداری امارات کے نائب صدر شیخ منصور بن زاید النہیان کے شیئرز کے ذریعے کی جا رہی ہے، جنہوں نے اس سے قبل اخبار کی خریداری کی ایک ناکام کوشش کو مالی مدد فراہم کی تھی۔ واضح رہے کہ ڈیلی ٹیلی گراف ایک تاریخی اخبار ہے جس کا آغاز 1855 میں ہوا تھا۔

یہ بھی پڑھیں: شمالی وزیرستان میں کرفیو نافذ

سابقہ بولی اور ریگولیٹری چیلنجز

یہ سابقہ بولی برطانیہ کی سابق حکومت کی جانب سے مسترد کر دی گئی تھی جس نے ایک قانون منظور کیا تھا جو غیر ملکی حکومتوں کو برطانوی اخبارات یا میگزینز کی ملکیت سے روکتا ہے۔ اب ریڈ برڈ کی یہ نئی ڈیل بھی ریگولیٹری منظوری کی منتظر ہے۔ دونوں ٹیلی گراف اخبارات اور اسپیکٹیٹر میگزین کو لائیڈز بینک نے نیلامی کے لیے پیش کیا تھا، جب انہوں نے بارکلی خاندان سے واجب الادا قرض کی عدم ادائیگی پر یہ اثاثے قبضے میں لے لیے تھے۔

یہ بھی پڑھیں: کویت نے پاکستان کیلئے تیل کریڈٹ سہولت میں 2 سال کیلئے توسیع کردی

مالی معاونت اور ملکیت کے مسائل

ریڈ برڈ اور شیخ منصور کے ادارے آئی ایم آئی نے بارکلی خاندان کا مکمل قرضہ ادا کر کے نیلامی کے عمل کو شارٹ کٹ کرنے کی کوشش کی تھی، مگر چونکہ مالی معاونت کا زیادہ تر حصہ آئی ایم آئی کی جانب سے آیا تھا، اس لیے حکومت نے مداخلت کر کے انہیں اکثریتی ملکیت حاصل کرنے سے روک دیا۔ اب خیال ظاہر کیا جا رہا ہے کہ آئی ایم آئی کا حصہ 15 فیصد سے کم ہوگا۔ اسپیکٹیٹر میگزین گزشتہ برس ہیج فنڈ ارب پتی سر پال مارشل کو 100 ملین پاؤنڈ میں فروخت ہو چکا ہے۔

معاہدے کے اثرات اور مستقبل کے منصوبے

ریڈ برڈ اس معاہدے کے ذریعے اپنی سابقہ سرمایہ کاری کی پوری رقم واپس حاصل کر لے گا۔ اس ڈیل سے ڈیلی ٹیلی گراف کے عملے کے لیے دو سالہ غیر یقینی دور کا خاتمہ ہو جائے گا، جس نے انہیں سرمایہ کاری اور ادارتی سمت کے حوالے سے پریشان رکھا تھا۔ ریڈ برڈ کے بانی جیری کارڈینالے نے بی بی سی کو بتایا کہ ان کا منصوبہ ٹیلی گراف کے قارئین اور سبسکرائبرز کو امریکا میں وسعت دینا ہے، جہاں وہ اس کے لیے بڑی مارکیٹ سمجھتے ہیں۔ ریڈ برڈ دیگر سرمایہ کاریوں کے علاوہ اطالوی فٹبال کلب اے سی میلان کا بھی مالک ہے۔