معمر خاتون کی بے توقیری پر لیسکو گارڈ معطل، مقدمہ درج ، پاور ڈویژن کا سخت نوٹس

واقعہ کی تفصیل

لاہور (ڈیلی پاکستان آن لائن) لیسکو دفتر میں معمر خاتون سے بدتمیزی اور بدسلوکی کرنے والے سیکیورٹی گارڈ کے خلاف پاور ڈویژن نے فوری ایکشن لیتے ہوئے سخت کارروائی کا آغاز کر دیا۔ واقعے کی ویڈیو منظرعام پر آنے کے بعد عوامی سطح پر شدید ردعمل سامنے آیا، جس پر حکام متحرک ہو گئے۔

یہ بھی پڑھیں: دھند اور سموگ کے باعث موٹرویز کن کن مقامات سے بند ہیں؟ تفصیلات جانیے

کارروائی کے اقدامات

ترجمان پاور ڈویژن کے مطابق، متاثرہ خاتون کی بے توقیری کے واقعے میں ملوث سیکیورٹی گارڈ کو فوری طور پر معطل کر دیا گیا ہے جبکہ اس کے خلاف مقدمہ درج کر کے پولیس کے حوالے کر دیا گیا ہے۔ پاور ڈویژن نے واقعے کو "ناقابل قبول انفرادی عمل" قرار دیتے ہوئے کہا ہے کہ عوام کی تذلیل اور قانون شکنی کسی صورت برداشت نہیں کی جائے گی۔

یہ بھی پڑھیں: حکومت پنجاب نے دفعہ 144 کے نفاذ کا اختیار ڈپٹی کمشنرز کو دیدیا

انکوائری کا آغاز

ترجمان پاور ڈویژن نے بتایا کہ گارڈ کے خلاف محکمانہ انکوائری کا آغاز کر دیا گیا ہے، تین دن کے اندر رپورٹ مکمل کرنے کی ہدایت جاری کر دی گئی ہے۔ گارڈ کو نوکری سے برخاست کرنے کے لیے بھی کارروائی جاری ہے۔

عوامی توقعات

پاور ڈویژن نے تمام بجلی کی تقسیم کار کمپنیوں (ڈسکوز) کو ہدایت دی ہے کہ عوام سے حسن سلوک اور احترام کو ہر صورت یقینی بنایا جائے۔ اس واقعے پر عوامی حلقے اور صارفین نے پاور ڈویژن کے فوری ایکشن کو سراہا ہے اور توقع ظاہر کی ہے کہ ایسے واقعات کی مکمل روک تھام کے لیے مؤثر اقدامات کیے جائیں گے۔