بلوچستان میں ایک اور مسافر بس پر حملہ، تین افراد جاں بحق، متعدد زخمی

کوئٹہ کے قریب مسافر کوچ پر حملہ

کوئٹہ (ڈیلی پاکستان آن لائن) قلات کے قریب مسافر کوچ پر فائرنگ اور دستی بم حملے کے نتیجے میں 3 مسافر جاں بحق ہوگئے۔ پولیس کے مطابق مسافر کوچ کراچی سے کوئٹہ جارہی تھی کہ قلات کے قریب فائرنگ کی گئی، جس کے باعث متعدد مسافر زخمی ہوگئے۔ پولیس نے بتایا کہ دہشت گردوں کے حملے میں 3 مسافرجاں بحق اور 10 زخمی ہوگئے، جبکہ زخمیوں میں دو مسافروں کی حالت تشویشناک ہے۔

یہ بھی پڑھیں: ایران سے مزید 547 افراد کی وطن واپسی، 7 روز کے دوران 3326 افراد پاکستان واپس پہنچ گئے

زخمیوں کی حالت اور طبی امداد

پولیس کے مطابق لاشوں اور زخمیوں کو ڈی ایچ کیو ہسپتال منتقل کردیا گیا ہے۔ دوسری جانب ترجمان بلوچستان حکومت نے کہا کہ سکیورٹی ادارے، ضلعی انتظامیہ اور ریسکیو ٹیمیں موقع پر موجود ہیں اور زخمیوں کو ڈی ایچ کیو ہسپتال قلات منتقل کیا جا رہا ہے۔ ترجمان کے مطابق ڈی ایچ کیو ہسپتال قلات میں ایمرجنسی نافذ کردی گئی ہے، سکیورٹی فورسز نے علاقے کو گھیرے میں لے لیا ہے، سرچ آپریشن جاری ہے اور سکیورٹی فورسز حملہ آوروں کا تعاقب کررہی ہیں۔

پچھلے واقعات کی یاد دہانی

واضح رہے کہ 10 جولائی کو دہشت گردوں نے کوئٹہ سے پنجاب جانے والی 2 مسافر بسوں سے 9 مسافروں کو شناخت کے بعد اغوا کرکے شہید کردیا تھا۔ بلوچستان ضلع کے ژوب اور لورالائی کی سرحد پر واقع سورڈکئی کے علاقے میں دہشت گردوں نے کوئٹہ سے لاہور جانے والی 2 کوچز میں سوار کم از کم 9 مسافروں کو اغوا کرنے کے بعد قتل کر دیا تھا۔ ژوب کے اسسٹنٹ کمشنر نوید عالم نے بتایا تھا کہ دونوں کوچز سے اغوا کیے گئے 9 افراد کو قتل کر دیا گیا۔