چترال میں 48 گھنٹوں کے دوران 3 خواتین سمیت 4 افراد کی خود کشی

چترال میں خودکشی کے واقعات

چترال (ڈیلی پاکستان آن لائن) اپرچترال کے مختلف علاقوں میں 2 روز کے دوران 3 خواتین سمیت 4 افراد نے مبینہ طور پر خودکشی کر لی ہے۔ پولیس کے مطابق تمام افراد نے دریا میں چھلانگ لگا کر خودکشی کی۔

پہلا واقعہ

پہلے واقعے میں ایک نو عمر لڑکی نے چیو بازار کے علاقے میں دریا میں چھلانگ لگا دی۔ بعد ازاں اس کی لاش دریا سے نکالی گئی اور پوسٹ مارٹم کے بعد والدین کے حوالے کر دی گئی۔ چیو بازار میں میڈیکل اسٹور کے مالک نے ڈان اخبار کے نمائندے کو بتایا کہ لڑکی کو ان کی دکان کے سامنے موجود ایک دکان سے ناشتہ خریدتے دیکھا گیا، اس کے بعد وہ پُل کے درمیان تک گئی اور بہت سے راہ گیروں کے سامنے دریا میں کود گئی۔

دوسرا واقعہ

دوسرے واقعے میں اپر چترال کے گاؤں رمن سے تعلق رکھنے والے ایک نو بیاہتا نوجوان نے دریا میں چھلانگ لگا کر اپنی زندگی کا خاتمہ کر لیا۔ پولیس نے واقعے کی تصدیق کی اور بتایا کہ متوفی کی شادی 3 روز قبل ہوئی تھی۔

تیسرا واقعہ

اپرچترال کے علاقے مستوج میں ایک اور واقعے میں ایک شادی شدہ خاتون نے دریا میں کود کر اپنی جان لے لی۔

چوتھا واقعہ

ایک اور واقعے میں اپر چترال کے گاؤں کوشت کی جماعت نہم کی ایک طالبہ نے بھی اسی انداز میں خودکشی کی، اس کی لاش اب تک برآمد نہیں ہو سکی۔ متوفیہ اسلام آباد کے ایک اسکول میں زیر تعلیم تھی اور گرمیوں کی چھٹیوں میں اپنے والدین کے ساتھ گاؤں آئی ہوئی تھی۔