پاکستان محفوظ اور خوشحال علاقائی ماحول کی تعمیر کا خواہاں ہے، پیچیدہ خطرات کے اس دور میں فوجی تعاون ناگزیر ہے، فیلڈ مارشل عاصم منیر

ریجنل چیفس آف ڈیفنس سٹاف کانفرنس

راولپنڈی(ڈیلی پاکستان آن لائن) پاکستان کی میزبانی میں ریجنل چیفس آف ڈیفنس سٹاف کانفرنس کا انعقاد ہوا، جس میں امریکا، قازقستان، کرغیزستان، تاجکستان اور ازبکستان کے اعلیٰ عسکری وفود نے شرکت کی۔ کانفرنس کا عنوان ’’رابطوں کو مضبوط اور امن کو یقینی بنانا‘‘ رکھا گیا۔

یہ بھی پڑھیں: توقیر حیدر کاظمی کا بطور ڈائریکٹر الحمراء آرٹس کونسل لاہور تبادلہ، سرگودھا میں الوداعی تقریب

فوجی تعاون اور اسٹریٹجک مکالمہ

آئی ایس پی آر کے مطابق، آرمی چیف فیلڈ مارشل سید عاصم منیر نے مہمان عسکری وفود کا خیر مقدم کیا اور کہا کہ پیچیدہ خطرات کے اس دور میں فوجی تعاون اور اسٹریٹجک مکالمہ ناگزیر ہے۔ کانفرنس میں وسط اور جنوبی ایشیاء کے اسٹریٹجک حالات پر جامع بات چیت کی گئی، سیکیورٹی تعاون، تربیتی اقدامات اور انسداد دہشتگردی کے لیے بہترین حکمت عملی کے تبادلے پر زور دیا گیا۔ مشترکہ تربیت، انسداد دہشتگردی اور انسانی ہمدردی کی کارروائیوں پر بھی اتفاق کیا گیا۔

پاکستان کی قیادت اور عزم

شرکاء نے پاکستان کی قیادت، مہمان نوازی اور دفاعی سفارت کاری کے اقدام کو سراہا۔ جبکہ پاکستان نے خطے میں پائیدار امن، باہمی تعاون اور مشترکہ سیکیورٹی مفادات کے فروغ کے عزم کا اعادہ کیا۔ فیلڈ مارشل سید عاصم منیر نے خطے میں امن، استحکام اور تعمیری مصروفیات کے لیے پاکستان کے ثابت قدم عزم کا اعادہ کرتے ہوئے کہا کہ پاکستان محفوظ اور خوشحال علاقائی ماحول کی تعمیر کا خواہاں ہے، اور اس مقصد کے لیے شراکت دار ممالک کے ساتھ کام کرنے کے لیے پوری طرح پُرعزم ہیں۔ مندوبین کی امن، احترام، اور قومی خودمختاری کو برقرار رکھنے کے مشترکہ عزم کی توثیق کی گئی۔