بھارت نے امریکہ سے ہتھیار اور طیارے خریدنے کے منصوبے پر عمل درآمد روک دیا

بھارت کی ہتھیاروں کی خریداری میں رکاوٹ

لندن(ڈیلی پاکستان آن لائن) بھارت نے امریکہ سے ہتھیار اور طیارے خریدنے کے منصوبے پر عمل درآمد روک دیا۔

یہ بھی پڑھیں: ایران اسرائیل جنگ اور سیز فائر، 16 دن بعد مشہد سے پہلی پرواز کی کراچی آمد

امریکی ہتھیاروں کی خریداری متوقف

برطانوی خبر رساں ادارے رائٹرز کی رپورٹ کے مطابق بھارت نے اسٹرائیکر وہیکلز، جیولین میزائل اور بوئنگ طیاروں سمیت امریکی ہتھیار خریدنے کے منصوبے روک دیے۔ خبر ایجنسی نے اپنی رپورٹ میں بھارتی حکام کا حوالہ دیتے ہوئے بتایا کہ بھارت اسلحے کی خریداری پر بات دوبارہ شروع کرنے سے پہلے امریکی ٹیرف پر وضاحت کا منتظر ہے۔ رپورٹ کے مطابق امریکا سے ہتھیاروں کی خریداری معاہدے کا اعلان بھارتی وزیر دفاع کے دورہ امریکا میں ہونا تھا تاہم بھارتی وزیر دفاع نے امریکا کا طے شدہ دورہ منسوخ کر دیا۔

بھارتی وزارت دفاع کا ردعمل

دوسری جانب بھارت نے امریکا سے ہتھیار اور طیارے خریدنے کے منصوبے پر عمل درآمد روکنے سے متعلق خبررساں ادارے رائٹرز کی رپورٹ کو غلط قرار دیا۔ بھارتی میڈیا نے بھارتی وزارت دفاع کے حکام کا حوالہ دیتے ہوئے کہا کہ برطانوی خبر رساں ادارے کی رپورٹ من گھڑت اور جھوٹ پر مبنی ہے اور امریکا سے اسلحے کی خریداری کے مختلف معاملات موجودہ طریقہ کار کے مطابق آگے بڑھ رہے ہیں۔