امت مسلمہ کو پاکستان کو فالو کرنا چاہیے، وزیر دفاع خواجہ آصف

خواجہ آصف کا اہم بیان

سیالکوٹ (ڈیلی پاکستان آن لائن) وزیر دفاع خواجہ آصف نے کہا ہے کہ مسلم امہ کو جاگنا پڑے گا، پوری مسلم امہ کے سامنے صرف ایک مثال ہے اور وہ پاکستان ہے، امت مسلمہ کو پاکستان کو فالو کرنا چاہیے۔

یہ بھی پڑھیں: بارڈر ٹریڈ کی بندش نے عوام کو معاشی بدحالی میں دھکیل دیا ہے، ڈاکٹر عبدالمالک بلوچ

اسرائیلی حملوں کی مذمت

سیالکوٹ میں جیو نیوز سے گفتگو کرتے ہوئے خواجہ آصف نے کہا کہ غزہ اور دیگر ممالک پر اسرائیلی حملے بڑی طاقتوں کی سرپرستی میں ہو رہے ہیں، غزہ پر مظالم کی مثال دنیا کی تاریخ میں نہیں ملتی۔ انہوں نے مزید کہا کہ بڑی طاقتوں نے اربوں ڈالر کا اسلحہ اس قتل عام کیلئے اسرائیل کو مہیا کیا، اسرائیل اپنا دائرہ وسیع کرتا جا رہا ہے، اب ذمہ داری مسلم امہ پر آ گئی ہے۔

یہ بھی پڑھیں: ایران کو یورینیئم افزودہ نہیں کرنے دیں گے، امریکہ اور ایران کے درمیان جامع امن معاہدہ ہو جائے گا : سٹیو وٹکوف

اسرائیل کی پشت پناہی کا انکشاف

خواجہ آصف کا کہنا تھا کہ سب کو معلوم ہے کہ اسرائیل کی پشت پناہی کون کر رہا ہے۔ یہ ایک حقیقت ہے کہ اس کے پیچھے برطانوی اور امریکی حکومتیں ہیں۔ اقوام متحدہ میں جو ووٹ پڑا ہے، سب کو معلوم ہے۔ انہوں نے کہا کہ مسلم امہ کو اپنے گریبان میں جھانکنا چاہیے، مسلم امہ کو جاگنا پڑے گا، پوری مسلم امہ کے سامنے صرف ایک مثال ہے اور وہ پاکستان ہے۔ پاکستان کے پاس وسائل کم ہیں لیکن اپنے سے پانچ گنا بڑے دشمن کو شکست دی، امت مسلمہ کو پاکستان کو فالو کرنا چاہیے، پاکستان کو مثال بنا کر متحد ہونا چاہیے۔ ایشیا کے اندر نیا پاور سینٹر تشکیل پارہا ہے، وہ مستقبل ہے۔

سیلاب اور تعمیرات کی صورتحال

سیلاب کے حوالے سے وزیر دفاع کا کہنا تھا کہ یہ بات درست ہے کہ قوم مزید سیلابی نقصانات کی متحمل نہیں ہوسکتی۔ دریاؤں اور نالوں سے تجاوزات ختم ہونی چاہئیں۔ ہم مزید نقصان سے بچ سکتے ہیں۔ ڈیم تو بنیں گے جب بننے ہیں، میں اس کے خلاف نہیں ہوں۔ انہوں نے کہا کہ ڈیم بنانے سے قبل جو اقدامات کر سکتے ہیں، وہ کریں، دریاؤں کے ارد گرد جو تعمیرات ہوئی ہیں وہ چھپ کر تو نہیں بنی ہیں، سب کے سامنے بنی ہیں۔