جھنگ میں ظالم باپ نے کلہاڑی کے وار سے 16 سالہ بیٹی کو قتل کر دیا، بیٹا شدید زخمی، حنا پرویز بٹ کا نوٹس

واقعہ کی تفصیلات

لاہور (ڈیلی پاکستان آن لائن) جھنگ کے علاقے تھانہ مسن کی حدود چک امیر والا میں ایک دل دہلا دینے والا واقعہ پیش آیا۔ پولیس رپورٹ کے مطابق محمد سلطان نامی سفاک باپ نے بھائی بہن کی آپس کی لڑائی سے تنگ آ کر اپنی 16 سالہ بیٹی کشور بی بی کو کلہاڑی کے وار سے قتل کر دیا جبکہ 19 سالہ بیٹے مزمل عباس کو بھی شدید زخمی کر دیا۔ بیٹی موقع پر ہی جاں بحق ہو گئی جبکہ بیٹے کو تشویشناک حالت میں ہسپتال منتقل کیا گیا۔ پولیس نے بروقت کارروائی کرتے ہوئے ملزم کو گرفتار کر لیا اور فرانزک ٹیمیں شواہد اکٹھے کر رہی ہیں۔

یہ بھی پڑھیں: امریکا کا پاکستان کے بیلسٹک میزائل پروگرام پرمزید پابندیوں کا اعلان

حکومتی ردعمل

وزیراعلیٰ پنجاب مریم نواز کی ہدایت پر چیئرپرسن پنجاب ویمن پروٹیکشن اتھارٹی حنا پرویز بٹ نے واقعے کا سخت نوٹس لیتے ہوئے ڈی پی او جھنگ سے رپورٹ طلب کی۔ خواتین اور بچیوں کے قاتل کسی رعایت کے مستحق نہیں ہیں اور ایسے درندہ صفت باپ کو عبرت کا نشان بنایا جائے گا۔

یہ بھی پڑھیں: پی ٹی آئی رہنما جیل سے رہا

حنا پرویز بٹ کا بیان

حنا پرویز بٹ نے اپنے بیان میں مزید کہا کہ خواتین پر ہاتھ اٹھانے والے کسی معافی کے لائق نہیں اور ملزم کو کیفرِ کردار تک پہنچانا حکومت کی اولین ترجیح ہے۔ انصاف ہر حال میں یقینی بنایا جائے گا اور متاثرہ خاندان کو ہر ممکن قانونی و نفسیاتی مدد فراہم کی جائے گی۔

قومی عزم

انہوں نے اس عزم کو بھی دہرایا کہ وزیراعلیٰ پنجاب مریم نواز کے وژن کے مطابق خواتین کے لیے محفوظ پنجاب ہمارا مشن ہے اور اس مشن پر کسی صورت سمجھوتہ نہیں کیا جائے گا۔