اسلام آباد ہائیکورٹ: عافیہ صدیقی وطن واپسی کیس لارجر بنچ میں سماعت کیلئے مقرر

اسلام آباد (ڈیلی پاکستان آن لائن) اسلام آباد ہائیکورٹ میں عافیہ صدیقی کی رہائی و وطن واپسی سے متعلق کیس کی سماعت 29 اکتوبر کو لارجر بنچ میں مقرر کی گئی ہے۔

نجی ٹی وی چینل دنیا نیوز کے مطابق رجسٹرار آفس نے کیس کے سماعت کے لیے کاز لسٹ جاری کر دی ہے۔ اسلام آباد ہائی کورٹ نے کیس کی سماعت کے لیے ایک چار رکنی لارجر بینچ تشکیل دیا ہے۔

جسٹس ارباب محمد طاہر اس چار رکنی لارجر بنچ کی سربراہی کریں گے، جبکہ بینچ میں جسٹس خادم حسین سومرو، جسٹس اعظم خان، اور جسٹس راجہ انعام امین منہاس بھی شامل ہوں گے۔

اس سے قبل بنچ کے ایک رکن کی عدم دستیابی کی وجہ سے پچھلی سماعت منسوخ کر دی گئی تھی۔ یکم ستمبر کو، جسٹس انعام امین منہاس نے لارجر بنچ کے لیے فائل چیف جسٹس کو جمع کرائی تھی۔ یہ کیس پہلے جسٹس سردار اعجاز اسحاق خان کی عدالت میں زیر سماعت تھا۔

جسٹس سردار اعجاز اسحاق نے گزشتہ سماعت پر وزیراعظم اور کابینہ کے ارکان کو توہین عدالت کے نوٹسز جاری کیے تھے۔ جسٹس سردار اعجاز اسحاق کے ٹیکس کیسز کے لیے سپیشل ڈویژن بنچ کا حصہ بننے کے بعد سنگل بنچ کے کیسز ٹرانسفر کر دیے گئے تھے。