خواتین کا موبائل ہیک کرنے کے بعد انہیں بلیک میل کرنے والے ملزم سمیر عرف “PK” نے گرفتاری کے بعد منہ کھول دیا، سنسنی خیز انکشافات

کراچی (ویب ڈیسک) مختلف لنکس کے ذریعے خواتین کا موبائل ہیک کرنے والے ملزم نے چار خواتین کیساتھ نازیبا ویڈیو بنانے کا اعتراف کرلیا ہے۔ انکشاف ہوا ہے کہ زیادہ تر خواتین ہی ملزم کا نشانہ رہی ہیں، وہ ان کی سوشل میڈیا آئی ڈیز ہیک کرکے معلومات چوری کرتا اور پھر ان کی بنیاد پر بلیک میل کرتا۔

پولیس کی کارروائی

تفصیل کے مطابق پولیس نے خواتین کے موبائل ہیک کرنے والے ملزم سمیر عرف پی کے کو گرفتار کرلیا۔ تفتیش کے دوران بتایا گیا کہ لاہور کے شہری سے 5 ہزار روپے میں لنک حاصل کیا جو مختلف سوشل میڈیا پلیٹ فارمز پر لنک بھیج کر موبائل یا آئی ڈی ہیک کرتا تھا۔ اس کے بعد، وہ گوگل اکاونٹ کی رسائی حاصل کرکے موبائل فونز کا مکمل ڈیٹا حاصل کر لیتا تھا۔

ملزم کا پس منظر

ملزم سمیر نے بتایا کہ وہ ساتویں جماعت پاس اور بیروزگار ہے۔ اس نے آخر میں رنچھوڑ لائن میں ایک لڑکی کا موبائل فون ہیک کیا جس کے بعد پولیس کے ہاتھوں پکڑا گیا۔ تفتیش کے دوران، سمیر نے انکشاف کیا کہ وہ اب تک 4 خواتین کی نازیبا ویڈیوز بنا چکا ہے جو اس نے ذاتی تسکین کے لیے محفوظ کی ہیں۔

تفتیشی عمل

ایس ایچ او تھانہ عید گاہ حفیظ اعوان کے مطابق ملزم سمیر کے موبائل فون سے 450 سے زائد نازبیا ویڈیوز ملی ہیں۔ ابتدائی تفتیش کے مطابق مبینہ طور پر 100 سے زائد لڑکیوں کو اپنی ہوس کا نشانہ بنایا گیا ہے۔ ملزم گلستان جوہر رابعہ سٹی کا رہائشی اور غیر شادی شدہ ہے، جبکہ اہل خانہ میں والدہ اور بہن شامل ہیں جو ملزم کے کرتوتوں سے واقف ہیں۔

گرفتاری کا طریقہ

حکام کے مطابق ملزم کی گرفتاری رنچھوڑ لائن کی ایک لڑکی کی مدد سے عمل میں لائی گئی۔ ملزم سمیر نے متاثرہ خاتون کا موبائل فون بھی ہیک کر لیا تھا، لیکن خاتون نے اپنے اہل خانہ کو ملزم کے حوالے سے تفصیلات فراہم کیں۔ متاثرہ خاتون نے بہادری کا مظاہرہ کرتے ہوئے ملزم کو ملنے کے لیے بلایا، جہاں پولیس نے ملزم کو شواہد کے ساتھ گرفتار کیا۔