دفتر خارجہ کا پاکستان اور افغانستان کے درمیان سعودی عرب میں مذاکرات سے لاعلمی کا اظہار

پاکستان اور افغانستان کے درمیان مذاکرات کی تفصیلات

اسلام آباد (ڈیلی پاکستان آن لائن) پاکستان اور افغانستان کے درمیان سعودی عرب میں مذاکرات کے حوالے سے دفتر خارجہ نے لاعلمی کا اظہار کیا ہے۔

میڈیا رپورٹس پر وضاحت

ترجمان دفتر خارجہ کے مطابق سعودی عرب میں پاک افغان مذاکرات سے متعلق مختلف میڈیا رپورٹس دیکھی گئی ہیں، مگر اس حوالے سے ہمیں کوئی معلومات نہیں ہیں۔

ترکیہ کی ثالثی کی پیشکش

ترجمان دفتر خارجہ نے کہا کہ پاکستان ترکیہ کے صدر کی ثالثی کی پیشکش کا استقبال کرتا ہے۔ پاکستان ترکیہ کے ثالثی وفد کو خوش آمدید کہے گا اور مذاکرات کے لیے بھی تیار ہے۔ انہوں نے وضاحت کی کہ ترکیہ وفد کے دورہ نہ کرنے کی وجہ پاکستان کا تعاون نہ کرنا نہیں ہے۔

افغانستان کے ساتھ سرحدوں کی بندش

ترجمان طاہر اندرابی نے کہا کہ ہم نے موجودہ صورتحال کی بنا پر افغانستان کے ساتھ سرحدیں بند کی ہیں اور اب افغانستان نے بھی اپنی جانب سرحدیں بند کر دی ہیں۔ اس حوالے سے افغانستان ہی درست جواب دے سکتا ہے۔ فی الوقت ہم نے سرحدیں امدادی کارروائی کے لیے ہی کھولی ہیں۔

کرغزستان کے صدر کا دورہ

ترجمان نے بتایا کہ کرغزستان کے صدر نے پاکستان کا دورہ کیا، جہاں کرغز صدر اور وزیراعظم نے وفد کی سطح پر ملاقاتیں کیں۔ دونوں ممالک کے درمیان دوطرفہ تعلقات کو مزید مستحکم کرنے پر اتفاق ہوا، اور تجارتی حجم کو سال 2027-28 تک 200 ملین تک پہنچانے کی بات بھی ہوئی۔

ایم او یوز پر دستخط

دفتر خارجہ کے ترجمان کے مطابق کرغز صدر کے دورے کے دوران 15 ایم او یوز پر دستخط کیے گئے۔ کرغز صدر نے بزنس فورم سے خطاب کیا، جس میں 20 سے زائد کرغز کمپنیاں اور 80 سے زائد پاکستانی تاجر شریک تھے۔

اسلام آباد کانکلیو کا افتتاح

ترجمان نے مزید کہا کہ اسحاق ڈار نے کرغز وزیر خارجہ اور صدر سے ملاقاتیں کیں، جبکہ مصر کے وزیر خارجہ نے بھی پاکستان کا دورہ کیا اور اسحاق ڈار نے اسلام آباد کانکلیو کا افتتاح کیا۔