اینٹی پاکستان مواد، تمام خلیجی ممالک نے بالی ووڈ فلم دھُرندھر پر پابندی لگادی

دبئی میں بھارتی فلم "دھُرندھر" کی ریلیز پر پابندی

دبئی (ڈیلی پاکستان آن لائن) بھارت کی نئی ایکشن فلم "دھُرندھر" کو خلیجی ممالک میں ریلیز کی اجازت نہیں ملی۔ بالی ووڈ ہنگامہ کی رپورٹ کے مطابق بحرین، کویت، عمان، قطر، سعودی عرب اور متحدہ عرب امارات، سب نے فلم کی نمائش سے انکار کر دیا ہے۔

یہ بھی پڑھیں: امریکا اور چین کے درمیان تجارتی معاہدہ ہوگیا

فلم پر پابندی کی وجوہات

ذرائع کے مطابق ان ممالک کو خدشہ تھا کہ فلم کو ’اینٹی پاکستان‘ یعنی پاکستان مخالف تصور کیا جائے گا، جس کے باعث سینسر بورڈز نے اسے منظور نہیں کیا۔ ماضی میں بھی اسی نوعیت کی بھارتی فلموں کو خلیج میں ریلیز کی اجازت نہیں ملی، اس کے باوجود فلم کی ٹیم نے کوشش کی، لیکن تمام ممالک نے فلم کے موضوع کو نامنظور کر دیا۔ نتیجتاً "دھُرندھر" کسی بھی گلف ملک میں ریلیز نہیں ہو سکی۔

یہ بھی پڑھیں: پروازوں کو بم سے اُڑانے کی دھمکی، بھارتی پولیس کو تگنی کا ناچ نچانے والا گرفتار

فلم کی کاسٹ اور کہانی

فلم میں رنویر سنگھ کے ساتھ اکشئے کھنہ، سنجے دت، آر مادھون، ارجن رامپال، سارا ارجن اور رکیش بیڈی شامل ہیں، جبکہ ہدایتکاری ادتیہ ڈَٹ نے کی ہے۔ کہانی ایک بھارتی افسر کے گرد گھومتی ہے جو پاکستان میں گھس کر وہاں کے انڈر ورلڈ اور سیاسی ڈھانچے کو ہلا دیتا ہے۔

پہلا موقع نہیں

یہ پہلا موقع نہیں۔ اس سے قبل 2024 میں آنے والی رتیک روشن اور دپیکا پڈوکون کی فلم "فائٹر" بھی ابتدا میں تمام خلیجی ممالک میں پابندی کا شکار ہوئی تھی، صرف متحدہ عرب امارات نے اسے ریلیز کیا تھا۔ فلم میں پلوامہ حملے کی عکاسی کے باعث پاکستان کے کچھ حلقوں نے اسے پاکستان مخالف پروپیگنڈا قرار دیا تھا تاہم ایک دن بعد یو اے ای نے بھی فلم کی اسکریننگ معطل کر دی تھی۔