آج سے 2 جنوری تک پنجاب کے مختلف علاقوں میں تیز ہواؤں کے ساتھ بارش کی پیشگوئی

اسلام آباد(ڈیلی پاکستان آن لائن) محکمہ موسمیات نے 2 جنوری تک پنجاب اور پہاڑی علاقوں میں بارش اور برف باری کی اطلاع دی ہے۔ آج رات مغربی علاقوں سے بارش کا سسٹم پاکستان میں داخل ہو گا۔

ملک بھر میں کہیں ہلکی کہیں تیز بارش کا امکان ہے۔ محکمہ موسمیات نے کہا ہے کہ بارش اور برف باری سے سردی کی شدت میں اضافہ ہوگا۔

30 دسمبر سے 2 جنوری تک تیز ہواؤں کے ساتھ مری اور گلیات میں برف باری کا امکان ہے۔

محکمہ موسمیات کے مطابق 31 دسمبر سے یکم جنوری کے دوران پنجاب کے بیشتر میدانی علاقوں میں تیز ہواؤں کے ساتھ بارش متوقع ہے۔

طبی ماہرین نے کہا ہے کہ بارش سے خشک موسم کی بیماریوں جیسے نزلہ، زکام، کھانسی اور بخار میں کمی آنے کی امید ہے۔

پی ڈی ایم اے پنجاب نے اپنے جاری الرٹ میں کہا ہے کہ محکمہ موسمیات کی پیشگوئی کے مطابق 30 دسمبر سے 2 جنوری کے دوران پنجاب کے پہاڑی علاقوں میں گرج چمک کے ساتھ بارش اور برف باری کے امکانات ہیں۔

راولپنڈی، مری، گلیات، اور پوٹھوہار ریجن میں بارش اور برف باری کا امکان ہے۔ 31 دسمبر سے 1 جنوری کے دوران لاہور، شیخوپورہ، سرگودھا، خوشاب، فیصل آباد، حافظ آباد، گجرانوالہ، منڈی بہاوالدین، گجرات، سیالکوٹ، جھنگ، اور ٹوبہ ٹیک سنگھ میں ہلکی بارش کی توقع ہے۔

ڈی جی عرفان علی کاٹھیا نے کہا کہ بارشوں کے باعث دھند و سموگ کی صورتحال میں کمی واقع ہوگی۔ اسموگ سے بچاؤ کے لیے ماسک کا استعمال کریں اور غیر ضروری باہر نہ نکلیں۔ پی ڈی ایم اے کنٹرول روم میں صورتحال کی مانیٹرنگ 24/7 جاری ہے۔

انہوں نے شہریوں کو خراب موسم کے دوران غیر ضروری سفر سے گریز کرنے کی ہدایت کی اور مری میں سیاحوں کو احتیاطی تدابیر اختیار کرنے کا مشورہ دیا۔ اطمینان کے لیے مری میں مختلف مقامات پر فسیلیٹیشن سنٹرز قائم کیے گئے ہیں۔

ڈی جی پی ڈی ایم اے نے دوران سفر فوگ لائٹس کے استعمال کی ہدایت کی اور ہنگامی صورتحال میں پی ڈی ایم اے کی ہیلپ لائن 1129 پر کال کرنے کا کہا۔