پاکستان سوشل سینٹر شارجہ میں بانی پاکستان قائدِاعظمؒ محمد علی جناح کے یومِ پیدائش کے سلسلہ میں تقریب، کیک کاٹا گیا

بانیٔ پاکستان کے یومِ پیدائش کی تقریب

دبئی (طاہر منیر طاہر) - بانیٔ پاکستان قائدِاعظم محمد علی جناحؒ کے 149ویں یومِ پیدائش کے موقع پر پاکستان سوشل سینٹر شارجہ میں پُروقار تقریب کا انعقاد کیا گیا، جس میں کمیونٹی کی نمایاں شخصیات اور کمیونٹی کے لوگوں نے شرکت کی۔

تقریب کا آغاز

تقریب کا باقاعدہ آغاز تلاوتِ قرآنِ پاک سے ہوا، جس کے بعد بانی پاکستان قائدِاعظمؒ محمد علی جناح کے 149ویں یومِ پیدائش کا کیک کاٹا گیا، جو قائدِاعظمؒ سے محبت اور عقیدت کی علامت تھی۔

تقریریں اور نظمیں

اس موقع پر صفّت حسن نے قائدِاعظمؒ کی حیات و خدمات پر پُراثر تقریر پیش کی جبکہ عائشہ حسن نے خوبصورت نظم کے ذریعے بانیٔ پاکستان کو خراجِ عقیدت پیش کیا۔

میزبانی اور پیغام

تقریب کی میزبانی کے فرائض صائمہ نقوی نے انجام دیے، جنہوں نے قائدِاعظمؒ کی شخصیت، جدوجہد اور ان کے سنہری اصولوں ایمان، اتحاد اور نظم و ضبط پر روشنی ڈالی اور نوجوان نسل کو ان پر عمل کرنے کا پیغام دیا۔

خراجِ تحسین

بعد ازاں چوہدری خالد حسین، صدر پاکستان سوشل سینٹر شارجہ نے اپنے چند کلمات میں قائدِاعظمؒ کی قیادت کو خراجِ تحسین پیش کیا اور کہا کہ ایسی تقریبات قومی شعور کو بیدار کرنے اور نئی نسل کو اپنی تاریخ سے جوڑنے میں اہم کردار ادا کرتی ہیں۔

شرکاء اور دعا

تقریب میں فراز احمد صدیقی، مسٹر نفیس، شفقت علی قادری اور دیگر اراکینِ کمیونٹی شامل تھے۔ تقریب کے اختتام پر پاکستان کی ترقی، خوشحالی اور سلامتی کے لیے خصوصی دعا کی گئی۔