راولپنڈی میں ماں اور بیٹی کی نازیبا تصاویر وائرل کرکے ہراساں اور بلیک میل کرنے میں ملوث ملزم گرفتار

راولپنڈی میں سائبر کرائم کی دو بڑی کارروائیاں

پہلا واقعہ: خود کو ایس ایس پی ظاہر کرکے دھوکہ دہی

راولپنڈی (ڈیلی پاکستان آن لائن) نیشنل سائبر کرائم انوسٹی گیشن ایجنسی نے 2 مختلف کاروائیوں میں خود کو ایس ایس پی ظاہر کرکے شہری سے رقم ہتھیانے کی کوشش میں ملوث 3 ملزمان کو گرفتار کرلیا۔ حکام کے مطابق ملزمان وقاص علی اور سعدی احمد نے خود کو ایس ایس پی راولپنڈی سہیل ظاہر کر کے شہری کو واٹس ایپ کے ذریعے گمراہ کن معلومات دے کر 1 لاکھ 25 ہزار روپے کا فراڈ کیا۔

انکوائری کے دوران ملزمان پر الزامات ثابت ہونے پر انہیں گرفتار کیا گیا، اور پیکا ایکٹ کی دفعات سمیت فراڈ و دھوکہ دہی کے جرم میں مقدمہ درج کیا گیا۔ سب انسپکٹر فہد الطاف کی سربراہی میں ٹیم تفتیش میں مصروف ہے۔

دوسرا واقعہ: خواتین کو ہراساں کرنے والا ملزم گرفتار

دوسرے واقعے میں، این سی سی آئی اے نے بڑی کارروائی کرتے ہوئے خواتین کو ہراساں کرنے والے ملزم محمد اویس کو گرفتار کر لیا۔ ملزم پر الزام تھا کہ اس نے خاتون اور اس کی والدہ کی نازیبا تصاویر وائرل کیں اور واٹس ایپ گروپس میں غلیظ کیپشنز کے ساتھ تصاویر شیئر کیں۔

خاندان کے افراد کو واٹس ایپ گروپس میں شامل کر کے ذہنی اذیت کا نشانہ بنایا گیا۔ انکوائری مکمل کرنے کے بعد سائبر کرائم سرکل اسلام آباد نے ملزم کے خلاف پیکا ایکٹ کے تحت مقدمہ درج کر کے اسے گرفتار کرلیا۔ سب انسپکٹر شہروز ریاض کی سربراہی میں تفتیش جاری ہے جس میں مزید انکشافات کی توقع ہے۔