خیبر پختونخوا میں 10 ہزار اساتذہ بھرتی کرنے کا فیصلہ

پشاور (ڈیلی پاکستان آن لائن) خیبر پختونخوا حکومت نے سرکاری اسکولوں میں عارضی بنیادوں پر 10 ہزار اساتذہ کی بھرتی کرنے کا فیصلہ کیا ہے، جنہیں ماہانہ 25 ہزار روپے تک تنخواہ دی جائے گی۔

بھرتی کی تفصیلات

صوبائی کابینہ کے فیصلے کے تحت بندوبستی اضلاع میں 5 ہزار 845 جبکہ ضم شدہ قبائلی اضلاع میں 4 ہزار 229 اساتذہ کی عارضی بھرتی کی جائے گی۔ میدانی علاقوں کے اسکولوں کے لیے اساتذہ کی تعیناتی کی مدت 16 جنوری سے 31 مئی تک ہوگی، جبکہ پہاڑی علاقوں میں عارضی اساتذہ یکم مارچ سے 30 جون تک خدمات انجام دیں گے۔

بھرتی کا اختیار

پرائمری اسکولوں کے لیے عارضی اساتذہ کی بھرتی کا اختیار سب ڈویژنل آفیسر کے پاس ہوگا، جبکہ مڈل اسکولوں کے لیے یہ اختیار ڈسٹرکٹ ڈپٹی ایجوکیشن آفیسر کو حاصل ہوگا۔ ہائی اور ہائیر سیکنڈری اسکولوں میں عارضی اساتذہ کی تعیناتی ڈسٹرکٹ ایجوکیشن آفیسر کے دائرہ اختیار میں ہوگی۔

نگرانی کا عمل

اساتذہ کی بھرتی کے پورے عمل کی نگرانی متعلقہ پیرنٹ ٹیچر کونسل کرے گی۔