سعودی عرب میں ایک ہفتے کے دوران اقامہ، لیبر اور سرحدی قانون کی خلاف ورزیوں پر 18 ہزار سے زائد افراد گرفتار

سعودی عرب میں جرائم کی رپورٹ

ریاض (ڈیلی پاکستان آن لائن) سعودی عرب میں ایک ہفتے کے دوران اقامہ، لیبر اور سرحدی قانون کی خلاف ورزیوں پر مزید 18 ہزار836 افراد کو گرفتار کر لیا گیا۔

گرفتاریوں کی تفصیلات

غیرملکی خبر ایجنسی کے مطابق یکم سے 7 جنوری تک 11 ہزار 710 افراد کو اقامہ قانون، 4 ہزار239 کو غیر قانونی سرحد عبور کرنے کی کوشش اور 2 ہزار 887 کو قانون محنت کی خلاف ورزی پر حراست میں لیا گیا۔ 10 ہزار 195 غیر قانونی تارکین کو ان کے ممالک واپس بھیجا گیا۔ غیر قانونی طور پر سعودی عرب میں داخل ہونے کی کوشش پر ایک ہزار 741 افراد کی گرفتاری عمل میں لائی گئی۔

گرفتار شدہ افراد کے قومی پس منظر

گرفتار ہونے والوں میں 60 فیصد ایتھوپین، 39 فیصد یمنی اور ایک فیصد کا تعلق دیگر ممالک سے ہے۔ 46 ایسے افراد کو بھی گرفتار کیا گیا ہے جو سرحد پار کرکے سعودی عرب سے ہمسایہ ملکوں میں داخل ہونے کی کوشش کر رہے تھے۔