جوڈیشل کمیشن نے پشاور ہائی کورٹ کے 6 ایڈیشنل ججز کو مستقل اور 4 ایڈیشنل ججز کی مدت میں 6 ماہ توسیع کی منظوری دے دی

جوڈیشل کمیشن کا اجلاس

اسلام آباد (ڈیلی پاکستان آن لائن) جوڈیشل کمیشن آف پاکستان نے پشاور ہائی کورٹ کے چھ ایڈیشنل ججز کو مستقل جج جبکہ چار ایڈیشنل ججز کی مدت میں چھ ماہ توسیع کی منظوری دے دی ہے۔ کمیشن کے اجلاس میں پی ٹی آئی کے ارکان پارلیمنٹ اور خیبرپختونخوا حکومت کے صوبائی وزیر شریک نہیں ہوئے۔

یہ بھی پڑھیں: ریاست جن کو دہشت گرد کہتی رہی، اب ان کو ادائیگیاں کریں گے: اسلام آباد ہائیکورٹ

مستقل ججز کی منظوری

جوڈیشل کمیشن اجلاس کے بعد جاری اعلامیہ میں کہا گیا ہے کہ کمیشن کا اجلاس چیف جسٹس پاکستان جسٹس یحییٰ آفریدی کی زیر صدارت ہوا۔ کمیشن نے متعلقہ ڈیٹا فارم، سابقہ پس منظر (اینٹی سیڈنٹس) اور پیش کردہ مواد کے مکمل جائزے کے بعد اکثریت سے ایڈیشنل جج جسٹس محمد طارق آفریدی، ایڈیشنل جج عبدالفیاض، ایڈیشنل جج جسٹس صلاح الدین، ایڈیشنل جج جسٹس صادق علی، ایڈیشنل جج جسٹس سید مدثر امیر، ایڈیشنل جج جسٹس قاضی جواد احسان اللہ کو مستقل جج بنانے کی منظوری دی۔

مدت میں توسیع

کمیشن نے جن چار ایڈیشنل ججوں کی مدت میں چھ ماہ کی توسیع کی منظوری دی ان میں ایڈیشنل جج جسٹس فرح جمشید، ایڈیشنل جج جسٹس انعام اللہ خان، ایڈیشنل جج جسٹس ثابت اللہ خان، ایڈیشنل جج جسٹس اورنگزیب شامل ہیں۔