ٹرمپ کا اعلان: ان ممالک پر ٹیرف عائد کر سکتا ہوں جو گرین لینڈ سے متعلق منصوبے کی حمایت نہیں کریں گے

ٹرمپ کے تجارتی ٹیرف کا انتباہ

واشنگٹن (ڈیلی پاکستان آن لائن) امریکی صدر ڈونلڈ ٹرمپ نے کہا ہے کہ وہ ان ممالک پر تجارتی ٹیرف عائد کر سکتے ہیں جو گرین لینڈ سے متعلق ان کے منصوبوں کی حمایت نہیں کریں گے۔ گرین لینڈ نیٹو کے رکن ملک ڈنمارک کا حصہ ہے، تاہم ٹرمپ کا کہنا ہے کہ یہ خطہ امریکا کی قومی سلامتی کے لیے نہایت اہم ہے۔

یہ بھی پڑھیں: صارفین کی شکایات کے ازالے کیلیے لیسکو ہیڈ کوارٹرز میں ای کچہری، فوری احکامات جاری

دباؤ ڈالنے کی کوشش

اے ایف پی کے مطابق وائٹ ہاؤس میں صحت کے موضوع پر منعقدہ ایک گول میز اجلاس کے دوران گفتگو کرتے ہوئے صدر ٹرمپ نے کہا کہ اگر ممالک گرین لینڈ کے معاملے پر امریکا کا ساتھ نہیں دیتے تو وہ ان پر ٹیرف لگانے پر غور کر سکتے ہیں۔ ان کے مطابق امریکا کو قومی سلامتی کے تقاضوں کے تحت گرین لینڈ کی ضرورت ہے، اور اسی بنیاد پر وہ سخت تجارتی فیصلے کرنے سے بھی گریز نہیں کریں گے۔

سفارتی تناؤ کے خدشات

ٹرمپ کے اس بیان نے ایک بار پھر امریکا اور اس کے اتحادیوں کے درمیان ممکنہ سفارتی تناؤ کے خدشات کو جنم دے دیا ہے، خصوصاً ایسے وقت میں جب گرین لینڈ کی جغرافیائی اور اسٹریٹجک اہمیت عالمی سیاست میں مسلسل زیرِ بحث ہے۔