پنجاب جونیئر ٹینس چیمپئن شپ میں محمد معاذ نے تین ٹائٹلز جیت کر میلہ لوٹ لیا

محمد معاذ کی شاندار کامیابی

لاہور(ڈیلی پاکستان آن لائن) محمد معاذ نے ڈاکٹر ضیاء فارماسیوٹیکلز پنجاب جونیئر ٹینس چیمپئن شپ 2026 میں غیر معمولی کارکردگی کا مظاہرہ کرتے ہوئے "ٹرپل کراؤن" (تین اعزازات) اپنے نام کر لیے۔ یہ چیمپئن شپ پنجاب ٹینس اکیڈمی، باغِ جناح لاہور میں کامیابی کے ساتھ اختتام پذیر ہوئی۔

یہ بھی پڑھیں: عدالتی حکم کے باوجود احتجاج پر توہین عدالت کی درخواست پر پی ٹی آئی کو نوٹس جاری

ٹورنامنٹ کی تفصیلات

محمد معاذ نے مختلف عمر کی کیٹیگریز میں اپنی تکنیکی مہارت، مستقل مزاجی اور اعصاب پر قابو پانے کی صلاحیت کا بھرپور مظاہرہ کیا، جس سے انہوں نے ثابت کر دیا کہ وہ پاکستان کے ابھرتے ہوئے ٹینس ستاروں میں نمایاں مقام رکھتے ہیں۔ بوائز انڈر 18 سنگلز کے فائنل میں معاذ نے عبداللہ رزاق کو یکطرفہ مقابلے کے بعد 1-8 سے شکست دے کر پہلی ٹرافی اٹھائی۔

یہ بھی پڑھیں: لاہور میں بسنت کی حتمی تیاریاں جاری، لاہور میں 40 علاقوں کو ریڈ زون قرار دیدیا گیا

ڈبلز اور سنگلز میں فتوحات

اس کے بعد انہوں نے اپنی فتوحات کا سلسلہ جاری رکھتے ہوئے عمر علی کے ساتھ مل کر بوائز انڈر 18 ڈبلز کا فائنل جیتا، جہاں انہوں نے محمد احمد افضل اور محمد ایان کی جوڑی کو 3-6 سے مات دی۔

یہ بھی پڑھیں: پاکستان اور امریکا کے درمیان تجارتی معاہدے پر بڑی پیش رفت

ٹرپل کراؤن کی تکمیل

معاذ نے اپنی تیسری کامیابی بوائز انڈر 14 سنگلز فائنل میں حاصل کی، جہاں انہوں نے ایک سنسنی خیز مقابلے کے بعد محمد ایان کو 6-7 سے ہرا کر اپنا ٹرپل کراؤن مکمل کیا۔ دیگر فائنلز میں بھی شاندار ٹینس دیکھنے کو ملی۔ بوائز انڈر 14 ڈبلز فائنل میں محمد ایان اور دانیال عبداللہ نے احمد فرید یاور اور شاہزین فیصل کو 3-6 سے ہرا کر ٹائٹل جیتا۔ بوائز انڈر 12 سنگلز کے فائنل میں محمد ایان نے مصطفیٰ عزیر رانا کو 4-6 سے شکست دے کر ٹائٹل اپنے نام کیا، جبکہ بوائز/گرلز انڈر 10 فائنل میں مصطفیٰ ضیاء نے دانیال افضل ملک کو 3-6 سے ہرا کر کامیابی حاصل کی۔

یہ بھی پڑھیں: وزیر اعلیٰ مریم نواز نے کراچی میں جناح انٹرنیشنل ایئرپورٹ کے قریب دھماکے کی مذمت کی

اختتامی تقریب

اختتامی تقریب کے مہمانِ خصوصی بریگیڈیئر (ریٹائرڈ) منظور احمد اور ڈاکٹر ضیاء فارماسیوٹیکلز کے سی ای او ڈاکٹر ذیشان ضیاء تھے۔ معزز مہمانوں نے کامیاب کھلاڑیوں میں ٹرافیاں اور انعامات تقسیم کیے اور ان کی محنت اور مسابقتی جذبے کی بھرپور تعریف کی۔

منتظمین کا جذبہ

اس موقع پر خطاب کرتے ہوئے مہمانوں نے پنجاب میں جونیئر ٹینس کے فروغ کے لیے منتظمین کی کوششوں کو سراہا اور اس بات پر زور دیا کہ نچلی سطح (گراس روٹ) پر ٹیلنٹ کی آبیاری کے لیے ایسے ٹورنامنٹ ناگزیر ہیں۔ پنجاب لان ٹینس ایسوسی ایشن کے سینئر ایگزیکٹو وائس پریذیڈنٹ راشد ملک نے جونیئر ٹینس کی سرپرستی کرنے پر اسپانسرز کا شکریہ ادا کیا اور امید ظاہر کی کہ وہ مستقبل میں بھی اس خوبصورت کھیل کی حمایت جاری رکھیں گے۔