تقسیم ہند کے خون خرابے کے باوجود بھارت اور آسٹریلیا کی پہلی ٹیسٹ سیریز جو منسوخ ہونے کے قریب تھی

سکواڈ میں روسی مودی بلے باز کے طور پر کھیل رہے تھے اور ٹیم میں ایک نئے فاسٹ بولر فضل محمود کو بھی شامل کیا گیا تھا۔ اس سکواڈ میں تجربہ کار کھلاڑیوں اور نئے ٹیلنٹ کا شاندار ملاپ موجود تھا۔

تاہم صحت کے مسائل کی بنا پر روسی مودی اور وجے مرچنٹ نے دورے سے اپنا نام واپس لے لیا۔ اپنے بڑے بھائی کی موت کی وجہ سے مشتاق علی بھی اس دورے میں شامل نہ ہو سکے۔

اب انڈین ٹیم کی قیادت لالہ امرناتھ کو سونپی گئی تھی جبکہ وجے ہزارے کو نائب کپتان مقرر کیا گیا تھا۔

تاہم تقسیم ہند کے دوران ہونے والے تشدد کی وجہ سے لالہ امرناتھ کا آسٹریلیا جانا مشکل نظر آ رہا تھا۔

سنہ 2004 میں ان کے بیٹے کی جانب سے لکھی گئی سوانح عمری میں یہ بتایا گیا ہے کہ انڈین پنجاب میں فرقہ وارانہ دھنگے کے دوران لالہ امرناتھ بال بال بچ گئے تھے۔ انھوں نے لاہور میں اپنے گھر اور اس کے قیمتی نوادرات کو ہمیشہ کے لیے کھو دیا۔

جب وہ دلی جانے کے لیے ٹرین میں سفر کر رہے تھے تو انڈین پنجاب میں ایک سٹیشن پر ایک پولیس اہلکار نے انھیں پہچانا اور ایک کڑا دے دیا جو زیادہ تر سکھ اور ہندو اپنی مذہبی شناخت کے لیے پہنتے ہیں۔

جب ایک سٹیشن پر ان کا سامنا ایک مجلسی ہجوم سے ہوا تو شاید اسی کڑے کی وجہ سے ان کی جان بچ گئی، کیوں کہ شاید ان لوگوں کو لگا کہ امرناتھ ان ہی کے مذہب سے تعلق رکھتے ہیں۔

دوسری طرف فضل محمود کو بھی ٹرین پر ایک قاتلانہ ہجوم کا سامنا کرنا پڑا۔

ٹیم کو 15 اگست سے پونا میں تربیتی سرگرمیاں شروع کرنی تھیں۔ اُس وقت تک یہ معلوم نہیں تھا کہ یہی دن برصغیر کی تقسیم کی تاریخ مقرر کرنے والا ہوگا۔

تاہم اس پس منظر میں پابندیوں کے باوجود فضل محمود پونا کے تربیتی کیمپ پہنچ گئے۔ بعد ازاں وہ ممبئی گئے جہاں سے انھوں نے لاہور کا راستہ اختیار کیا۔

سنہ 2003 میں شائع ہونے والی اپنی سوانح عمری میں انھوں نے بتایا کہ ٹرین میں دو افراد نے انھیں نقصان پہنچانے کی کوشش کی لیکن سابق انڈین کپتان سی کے نائڈو نے ہاتھ میں بلّا پکڑ کر ان افراد کو دھمکایا اور بھگا دیا۔

جب فضل محمود کرفیو زدہ لاہور پہنچے تو وہاں کے خون خرابے اور ہولناک منظر کو دیکھ کر متاثر ہوئے، مگر انھوں نے فیصلہ کیا کہ وہ پاکستان میں رہیں گے اور دورے کے لیے آسٹریلیا نہیں جائیں گے۔

بعد ازاں فضل محمود پاکستان کرکٹ ٹیم میں شامل ہو گئے اور اپنا پہلا ٹیسٹ میچ 1953 – 1952 میں انڈیا کے خلاف کھیلا۔

انڈین سکواڈ کے دو اور کھلاڑی گل محمد اور عامر الہی جو آسٹریلیا کے دورے پر جا رہے تھے، بعد ازاں پاکستان منتقل ہو گئے اور 1953 – 1952 میں انڈیا کے خلاف ٹیسٹ کرکٹ کھیلی۔

ان تمام مشکلات کے باوجود انڈین ٹیم آسٹریلیا کے دورے پر گئی جبکہ ٹیم میں اس کے چار بہترین کھلاڑی شامل نہیں ہو سکے تھے، تاہم انڈیا سیریز کے چاروں میچز ہار گئی تھی۔ لیکن یہ بھی کسی معجزے سے کم نہیں کہ اتنا سب ہونے کے باوجود بھی انڈیا نے اپنا آسٹریلیا کا دورہ مکمل کیا۔