عید سے قبل پنجاب میں مہنگائی کا جن پھر سے بے قابو ہوگیا

مہنگائی کا بڑھتا ہوا رجحان

فیصل آباد (آئی این پی) عید سے قبل فیصل آباد سمیت پنجاب بھر میں مہنگائی کا جن پھر سے بے قابو، چکن کی قیمت 700 روپے ہو گئی، چینی بھی مزید مہنگی کر دی گئی۔

یہ بھی پڑھیں: گوتم اڈانی پر امریکہ میں رشوت کے الزامات: بھارت کے لیے ایک بڑا چیلنج

مرغی اور انڈوں کی قیمتوں میں اضافہ

تفصیلات کے مطابق فیصل آباد سمیت پنجاب بھر میں عید الاضحٰی کی آمد سے قبل زندہ چکن اور مرغی کے گوشت کی قیمتوں کو پر لگ گئے ہیں۔ پرچون سطح پر زندہ برائلر مرغی کی قیمت مزید 3 روپے اضافے سے 411 روپے فی کلو جبکہ فارمی انڈوں کی قیمت مزید ایک روپے اضافے سے 281 روپے فی درجن کی سطح پر پہنچ گئی۔ اوپن مارکیٹ میں مختلف مقامات میں برائلر گوشت کی مختلف قیمتیں وصول کی جارہی ہیں۔ شہر کے مختلف مقامات پر برائلر گوشت 680 سے 700 روپے کلو فروخت کیا جارہا ہے۔

یہ بھی پڑھیں: پاکستان اور افغانستان کے معاملات میں بہتری آرہی ہے: عرفان صدیقی

چینی کی قیمتوں میں اضافہ

دوسری جانب فیصل آباد سمیت صوبے بھر میں چینی کی قیمت میں بھی بڑا اضافہ کر دیا گیا ہے۔ پاکستان کے تیسرے بڑے شہر فیصل آباد میں چینی کی قیمتوں میں ایک بار پھر اضافہ دیکھنے میں آیا ہے جس پر کریانہ ایسوسی ایشن نے شوگر ملز اور بیورو کریسی کو اس کا ذمہ دار قرار دیدیا۔ اوپن مارکیٹ میں چینی کی قیمت 164 روپے فی کلو سے بڑھ کر 175 روپے فی کلو تک جا پہنچی ہے۔ مرکزی کریانہ ایسوسی ایشن نے اس صورتحال کی ذمہ داری براہِ راست شوگر ملز مالکان اور متعلقہ بیوروکریسی پر عائد کرتے ہوئے کہا ہے کہ فروری میں چینی کی قیمت 125 روپے فی کلو تھی لیکن ایکسپورٹ کی اجازت ملنے کے بعد قیمتوں کو پر لگ گئے۔

حکومتی اقدامات پر سوالات

ایسوسی ایشن کی جانب سے کہا گیا ہے کہ حکومت نے زائد اسٹاک نہ ہونے کے باوجود چینی کی برآمد کی اجازت دی جس کا فائدہ صرف مخصوص عناصر نے اٹھایا۔ شوگر ملز مالکان بلاجواز ہمیں قیمتوں میں اضافے کا ذمہ دار قرار دے رہے ہیں جبکہ اصل کنٹرول اور ذخائر کا اختیار انہی کے پاس ہے۔