کراچی: قتل کیے گئے 3 خواجہ سراؤں میں سے 2 کی شناخت ہو گئی

کراچی میں خواجہ سراؤں کا قتل

کراچی(ڈیلی پاکستان آن لائن) ایم نائن موٹر وے کے قریب نجی ہاؤسنگ سوسائٹی میں 3 خواجہ سراؤں کا قتل کیا گیا، جن میں سے 2 کی شناخت کر لی گئی ہے۔

قتل کئے گئے افراد کی شناخت

روزنامہ جنگ کے مطابق پولیس کا کہنا ہے کہ قتل کئے گئے 3 میں سے 2 خواجہ سراؤں کی شناخت ان کے اصل نام محمد جیئل اور الیکس ریاست کے نام سے ہوئی ہے۔

خواجہ سراؤں کی تنظیم نے تینوں ہلاک افراد کی شناخت عینی، عصمہ اور ثمینہ کے نام سے کی۔

احتجاج کا آغاز

دوسری جانب جناح ہسپتال ایمرجنسی وارڈ کے باہر خواجہ سراؤں نے احتجاج شروع کردیا۔ مظاہرین کا کہنا ہے کہ اگر ملزمان گرفتار نہ ہوئے تو وہ وزیر اعلیٰ ہاؤس کے باہر بھی احتجاج کریں گے۔

واقعے کی تفصیلات

واضح رہے کہ موٹر وے ایم نائن کے قریب جھاڑیوں سے 3 خواجہ سراؤں کی گولیاں لگی لاشیں ملی ہیں۔ 2 خواجہ سراؤں کو سینے پر اور 1 کو سر پر گولی مار کر قتل کیا گیا، جائے وقوع سے نائن ایم ایم گولیوں کے 2 خول ملے ہیں۔

پولیس کی ابتدائی تحقیقات

سینئر سپرنٹنڈنٹ آف پولیس (ایس ایس پی) ملیر عبد الخالق پیرزادہ نے میڈیا کو بتایا کہ جائے وقوع سے پرس، ٹشو پیپرز اور دیگر سامان ملا ہے۔ خواجہ سراء معمول کے مطابق اسی مقام پر آتے تھے اور انہیں اسی جگہ نشانہ بنایا گیا ہے۔

حکام کی کارروائیاں

عبدالخالق پیرزادہ نے کہا کہ لاشوں کو قانونی کارروائی کے بعد جناح ہسپتال منتقل کر دیا گیا ہے۔ واقعے کا نوٹس لیتے ہوئے وزیرِ اعلیٰ سندھ نے قاتلوں کی گرفتاری کا حکم دیا ہے۔

وزیر داخلہ سندھ کا نوٹس

واقعے پر وزیرِ داخلہ سندھ نے ایس ایس پی ملیر سے ابتدائی رپورٹ طلب کی ہے۔