امید ہے وزیر اعلیٰ خیبر پختونخوا سہیل آفریدی تعاون کی پیشکش کو قبول کریں گے، وزیر اعظم شہباز شریف

وزیراعظم کی دہشتگردی کیخلاف اپیل

اسلام آباد(ڈیلی پاکستان آن لائن) وزیراعظم شہباز شریف نے دہشتگردی کے خاتمے کے لیے خیبر پختونخوا سمیت تمام صوبوں سے مل کر کام کرنے کی اپیل کی۔ چترال میں دانش سکول کا سنگ بنیاد رکھنے کی تقریب سے خطاب کرتے ہوئے وزیراعظم نے کہا کہ ہمیں امن و اتحاد کا ثبوت دینا چاہیے۔ سیاست کریں لیکن ملک کی ترقی اور دہشتگردی کے خاتمے کے لیے ایک رہیں۔ انہوں نے سہیل آفریدی کو وزیر اعلیٰ خیبر پختونخوا منتخب ہونے پر مبارک باد دی اور تعاون کی پیشکش کی، امید ہے کہ وہ میری پیشکش کو قبول کریں گے۔

یہ بھی پڑھیں: بھارتی فلم ”ڈان 3” میں رنویر سنگھ کے ساتھ ہیروئن کا نام سامنے آگیا

عاصم منیر کی بہادری کی ستائش

وزیر اعظم شہباز شریف نے معرکہ حق میں فیلڈ مارشل عاصم منیر اور افواج پاکستان کی بہادری کو سراہا۔ جنگ بندی میں اہم کردار ادا کرنے پر امریکی صدر ڈونلڈ ٹرمپ کا شکریہ ادا کیا۔ انہوں نے کہا کہ چترال کے شاندار علاقے میں حاضر ہوا ہوں۔ خیبر پختونخوا کے عوام بہادر اور غیور ہیں، انہوں نے پاکستان کے لیے بڑی قربانیاں دی ہیں۔ چترال والوں کی حب الوطنی مثالی ہے، آپ نے پاکستان کی ترقی کے لیے عظیم کاوشیں کی ہیں، چترال کے عوام بہت مہذب اور پُرامن لوگ ہیں، چترال آکر بہت خوشی ہوئی۔

یہ بھی پڑھیں: اداکارہ صائمہ نور کا ڈرامے میں ڈانس کا کلپ وائرل، مداحوں کی پرانی یادیں تازہ

تعلیمی ترقی کے لیے دانش سکول

وزیراعظم نے مزید کہا کہ نواز شریف پورے ملک کی ترقی میں ہمیشہ مصروف رہتے تھے اور انہیں خیبر پختونخوا کے ترقیاتی منصوبوں میں دلچسپی ہوتی تھی۔ چترال کے عوام کے لیے خاص تحفہ لے کر آیا ہوں، دانش اسکول منصوبہ آپ کا حق ہے، یہ احسان نہیں۔ عام آدمی کے بچے اس دانش اسکول میں جائیں گے، تعلیمی معیار بہترین ہوگا اور یہ تعلیم بالکل مفت ہوگی۔ وفاق آپ کے ساتھ بھرپور تعاون کرے گا۔

مستقبل کے لیے عزم

شہباز شریف نے کہا کہ پاکستان کو عظیم بنائیں گے، پاکستان کو اللّٰہ تعالیٰ نے بے پناہ معدنیات سے نوازا ہے۔ نوجوانوں کو اعلیٰ تعلیم دلوا کر ایک اثاثہ بنوائیں گے، چترال کے بچوں اور بچیوں کو بھی لیپ ٹاپس دیے جائیں گے۔ وزیراعظم شہباز شریف نے چترال میں اسپتال بنانے کا اعلان کیا اور کہا کہ اسلام آباد جاتے ہی چترال میں گیس پلانٹ کے آرڈر جاری کروں گا، چترال میں فی الفور گیس پلانٹ لگایا جائے گا۔