چاغی میں آئل ٹینکر اور مسافر گاڑی کے درمیان تصادم، 10 افراد جاں بحق

ہولناک تصادم کی اطلاع

کوئٹہ (ڈیلی پاکستان آن لائن) بلوچستان کے ضلع چاغی میں آئل ٹینکر اور مسافر گاڑی کے درمیان ہونے والے ہولناک تصادم میں 10 افراد جان سے ہاتھ دھو بیٹھے جبکہ 6 افراد زخمی ہو گئے۔ پولیس کے مطابق یہ حادثہ تحصیل نوکنڈی کے قریب ریکوڈک سائٹ روڈ پر پیش آیا، جہاں دونوں گاڑیاں آمنے سامنے ٹکرا گئیں۔

یہ بھی پڑھیں: ہمارا دل مقبوضہ کشمیر کے اسیر عوام کے ساتھ دھڑکتا ہے، پاکستان تحریک انصاف کا ’’یوم سیاہ ‘‘ پر پیغام

حادثے کی تفصیلات

نجی ٹی وی 24 نیوز کے مطابق حادثے کے نتیجے میں مسافر گاڑی کے ڈرائیور سمیت متعدد افراد موقع پر ہی جاں بحق ہو گئے۔ پولیس نے ڈرائیور کی شناخت خدائے نظر کے طور پر کی ہے، جو تفتان کا رہائشی بتایا جاتا ہے۔ پولیس ذرائع کا کہنا ہے کہ جاں بحق ہونے والے دیگر افراد کا تعلق افغانستان سے ہو سکتا ہے اور وہ غیر قانونی طور پر پاکستان کے راستے ایران جانے کی کوشش کر رہے تھے۔

زخمیوں کی حالت

حادثے کے بعد زخمیوں اور جاں بحق افراد کی لاشوں کو فوری طور پر نوکنڈی ہسپتال منتقل کیا گیا، جہاں تین زخمیوں کی حالت تشویشناک بتائی جا رہی ہے۔