لاہور کو سکھ کا سانس لینے دو، واپس جا کر کے پی کے لوگوں کی داد رسی بھی کر لو: عظمیٰ بخاری

وزیر اطلاعات کی ری ایکشن

لاہور (ڈیلی پاکستان آن لائن) وزیر اطلاعات و ثقافت پنجاب عظمیٰ بخاری نے پی ٹی آئی کی نام نہاد ’’سٹریٹ موومنٹ‘‘ پر ردِعمل دیتے ہوئے کہا ہے کہ گزشتہ رات تک بنگلہ دیش کی تصاویر لگا کر تحریک کی کامیابی کا تاثر دینے کی کوشش کی جاتی رہی، مگر دن کی روشنی نے تمام حقائق کھول کر رکھ دیئے۔

یہ بھی پڑھیں: پنجاب سٹیڈیم میں لاہور یوتھ فیسٹیول کیلئے 100 میٹرگرلزٹرائلزکا انعقاد، ڈی جی سپورٹس پنجاب پرویز اقبال کی بطور مہمان خصوصی شرکت

عوامی پذیرائی کا پول کھل گیا

وزیر اطلاعات پنجاب نے کہا کہ سٹریٹ موومنٹ کے دعوے داروں کو نعروں کا جواب دینے والا بھی کوئی نہ ملا جس سے ان کی عوامی پذیرائی کا پول کھل گیا۔ پاکستان کے یورپ لاہور کی خوب سیر کرلی گئی، اب خدا کے لیے واپس تشریف لے جائیں اور شہر کو سکھ کا سانس لینے دیں۔ لاہور کو آپ کے پروٹوکول سے زیادہ متاثر ہونے کی ضرورت نہیں۔

خیبر پختونخوا کے عوام کی داد رسی

عظمیٰ بخاری نے مزید کہا کہ جس طرح لاہور کا رخ کیا گیا، اسی طرح واپس جا کر خیبر پختونخوا کے عوام کی بھی شنوائی کریں، وہاں کے لوگوں کی داد رسی بھی ضروری ہے۔ سیاسی ڈرامے، تصویریں اور پروپیگنڈہ عوام کی آنکھوں میں دھول جھونکنے کی ناکام کوششیں ہیں، جس کا جواب عوام نے خاموشی سے دے دیا ہے۔