لاہور یوتھ فیسٹیول کے لوگو اور فلوٹ کی رونمائی کا تیسرا دن، طلباء کی جانب سے زبردست خیر مقدم

لاہور یوتھ فیسٹیول کا آغاز

لاہور (ڈیلی پاکستان آن لائن) لاہور یوتھ فیسٹیول کے لوگو اور فلوٹ کی رونمائی کے تیسرے دن کنگ ایڈورڈ میڈیکل کالج، فاطمہ جناح میڈیکل کالج، کوئین میری کالج اور یونیورسٹی آف انجینئرنگ اینڈ ٹیکنالوجی میں طلبا و طالبات کو فیسٹیول کی سرگرمیوں کے بارے میں تفصیلی آگاہ کیا گیا۔ طلبا و طالبات نے روایتی جوش و خروش کا مظاہرہ کیا اور لوگو اور فلوٹ کے ساتھ سیلفیاں بھی بنائیں۔

یہ بھی پڑھیں: عمران خان کو جیل میں سہولیات کی مبینہ عدم فراہمی کیخلاف عدالت سے رجوع کرلیا

فیسٹیول کی اہمیت

طلباء نے یوتھ فیسٹیول کو لاہور کے ایونٹس میں ایک اہم اضافہ قرار دیتے ہوئے کہا کہ یہ فیسٹیول طالب علموں کو صحت مندانہ اور مثبت سرگرمیاں فراہم کرنے میں اہم کردار ادا کرے گا۔ طلباء نے کہا کہ انجینئرنگ اور میڈیکل کی پڑھائی کے سخت اوقات کار کی وجہ سے ان کے پاس تفریح کے مواقع محدود ہوتے ہیں، ایسی میں لاہور یوتھ فیسٹیول جیسے ایونٹس کا انعقاد ذہنی اور جسمانی صحت کیلئے انتہائی ضروری ہے۔

فیسٹیول کی سرگرمیاں

واضح رہے کہ 7 نومبر سے 9 نومبر تک منعقد ہونے والا یہ لاہور یوتھ فیسٹیول مختلف ثقافتی اور کھیلوں کی سرگرمیوں پر مشتمل ہوگا۔ اس میں ٹیلنٹ شو، سٹینڈ اپ کامیڈی اور آرٹ و ٹیکنالوجی کی نمائش کے علاوہ میراتھن ریس، سائیکلنگ، جمناسٹک سمیت دیگر مقابلے منعقد کیے جائیں گے۔ تعلیمی اداروں کے طلباء و طالبات نے لاہور یوتھ فیسٹیول میں بھرپور شرکت کے عزم کا اظہار کیا، جبکہ یونیورسٹی کے اساتذہ نے لاہور یوتھ فیسٹیول جیسے مزید ایونٹس کے انعقاد پر زور دیا اور ایسی سرگرمیوں کو خوش آئند قرار دیا ہے۔