لاہور؛ ای چالاننگ میں سینچری مکمل کرنے والی گاڑی پکڑی گئی، بھاری جرمانہ عائد

ٹریفک قوانین کی خلاف ورزی پر کارروائی

لاہور (ڈیلی پاکستان آن لائن) ٹریفک قوانین کی خلاف ورزی پر ای چالان نادہندگان کے خلاف گھیرا تنگ کر دیا گیا ہے۔ ای چالاننگ میں سینچری مکمل کرنے والی گاڑی کو دھر لیا گیا جس پر 50 ہزار سے زائد جرمانہ عائد کر دیا گیا۔

یہ بھی پڑھیں: ریاض میں عرب رہنماؤں کا اجلاس: ٹرمپ کی واپسی سے امید اور غیر یقینی کے درمیان جھولتا مشرقِ وسطیٰ

مال روڈ پر خلاف ورزیوں کی تفصیلات

نجی ٹی وی چینل ایکسپریس نیوز کے مطابق، سی ٹی او لاہور عمارہ اطہر کا کہنا ہے کہ شہریوں کو اب ٹریفک قوانین کی خلاف ورزی سوچ سمجھ کر کرنی ہوگی۔ مال روڈ پر ایک گاڑی کو 108 مرتبہ ٹریفک قوانین کی خلاف ورزی کرنے پر دھر لیا گیا۔ اس گاڑی کے ڈرائیور نے 80 مرتبہ ٹریفک سگنل، 19 مرتبہ لین لائن، اور 9 مرتبہ سیٹ بیلٹ کی خلاف ورزی کی تھی۔

ای چالان کی خلاف ورزی کے نتائج

سی ٹی او لاہور عمارہ اطہر نے کہا کہ ای چالان نادہندہ گاڑیوں کے مالکان پولیس سروسز سے مستفید نہیں ہو سکیں گے۔ ای چالان نادہندہ ہونے کی صورت میں ڈرائیونگ لائسنس، کریکٹر سرٹیفکیٹ، ویری فیکشن اور دیگر 14 سہولیات میسر نہیں ہوں گی۔ اس کے علاوہ، ای چالان سے بچنے کے لیے گاڑیوں کی نمبر پلیٹس سے چھیڑ چھاڑ کرنے والوں کے خلاف بھی کریک ڈاؤن جاری ہے۔