ٹی 20 ورلڈ کپ: سپر 8 مرحلے سے کون کونسی ٹیمیں آگے جائیں گی، بھارتی ٹیم کی راہ میں کیا رکاوٹ ہے؟ سابق کھلاڑیوں کی اہم پیشگوئیاں

لاہور (مانیٹرنگ ڈیسک)

ٹی 20 ورلڈ کپ: سپر 8 مرحلے کی پیشگوئیاں

سپر 8 مرحلے سے کون کون سی ٹیمیں آگے جائیں گی، بھارتی ٹیم کی راہ میں کیا رکاوٹ ہے؟ سابق کھلاڑیوں نے اہم پیشگوئیاں کر دیں۔

محمد عامر کی پیشگوئی

تفصیلات کے مطابق ’’جیو نیوز‘‘ کے پروگرام ’’ہارنا منع ہے‘‘ میں ٹی ٹوئنٹی ورلڈ کپ 2009ء جیتنے والی ٹیم کے فاسٹ بالر محمد عامر نے سپر 8 مرحلے سے سیمی فائنل تک رسائی حاصل کرنے والی ٹیموں سے متعلق پیشگوئی کی۔ محمد عامر کا کہنا ہے کہ بھارت کی موجودہ کارکردگی کو دیکھتے ہوئے کہہ سکتا ہوں کہ بھارت کے ٹی ٹوئنٹی ورلڈ کپ کے سیمی فائنل میں پہنچنے کے امکانات کم ہیں۔

بھارتی بیٹنگ لائن کی کمزوری

انہوں نے بھارتی بیٹنگ لائن کو ٹورنامنٹ میں آگے بڑھنے کی راہ میں بڑی رکاوٹ قرار دے دیا۔ جنوبی افریقہ اور ویسٹ انڈیز کی ٹیمیں سپر 8 مرحلے میں کامیاب ہونے کے بعد سیمی فائنل میں اپنی جگہ بنائیں گی۔ اگر آپ پاکستان کے خلاف میچ کے علاوہ بھارت کے دیگر مقابلے دیکھ لیں تو ان کی بیٹنگ لائن بکھر جاتی ہے، بیٹنگ کی اس کمزوری کے باعث بھارتی ٹیم پر سپر 8 مرحلے میں دباؤ مزید بڑھ جائے گا۔

ویسٹ انڈیز کی بالنگ لائن

ویسٹ انڈیز کی بالنگ لائن کا ذکر کرتے ہوئے محمد عامر نے کہا کہ گڈاکیش موتی، عقیل حسین، جیسن ہولڈر اور شمر جوزف مضبوط اٹیک کے ساتھ کسی بھی بیٹنگ لائن کو مشکل میں ڈال سکتے ہیں۔ شیرفین ردرفورڈ اور روومین پاؤل جیسے ہارڈ ہٹرز بھی کسی بھی ٹیم پر دباؤ ڈالنے کی صلاحیت رکھتے ہیں۔

جنوبی افریقہ کی طاقت

محمد عامر نے جنوبی افریقہ کے حوالے سے کہا کہ میں کیوں کہہ رہا ہوں کہ جنوبی افریقہ سیمی فائنل میں جائے گا؟ کیونکہ ان کی فاسٹ بالنگ مکمل ہے، اسپن اٹیک مکمل ہے اور بیٹنگ فارم میں ہے۔

دیگر پینالسٹس کی رائے

دوسری جانب پروگرام کے دیگر پینلسٹس نے رائے دی کہ بھارت یقینی طور پر سیمی فائنل میں جگہ بنائے گا۔ سابق کپتان راشد لطیف نے پاکستان اور بھارت کے درمیان سیمی فائنل کی پیشگوئی کی، جبکہ احمد شہزاد نے کہا کہ بھارت اور جنوبی افریقہ سیمی فائنل تک رسائی حاصل کریں گے۔