خیبرپختونخوا میں دہشت گردی کا بڑا منصوبہ ناکام بنا دیا گیا، خاتون خودکش حملہ آور گرفتار

ڈی آئی خان میں دہشتگردی کا بڑا منصوبہ ناکام

پشاور(ڈیلی پاکستان آن لائن)ڈی آئی خان میں محکمہ انسداد دہشتگردی خیبرپختونخوا نے بروقت کارروائی کرتے ہوئے دہشتگردی کا ایک بڑا منصوبہ ناکام بنا دیا۔ سی ٹی ڈی ڈیرہ ریجن نے خفیہ اطلاع پر کارروائی کرتے ہوئے ایک مبینہ خاتون خودکش حملہ آور کو گرفتار کرلیا جس کے قبضے سے اسلحہ اور دیگر سامان بھی برآمد ہوا۔

یہ بھی پڑھیں: لاہور؛ کار سوار شہری کو ناکے پر روکنا پولیس اہلکاروں کو مہنگا پڑ گیا

خفیہ اطلاع پر کارروائی

ڈی آئی خان میں محکمہ انسداد دہشتگردی خیبرپختونخوا نے حساس اداروں کی مصدقہ اطلاع پر شیخ یوسف خیمہ بستی میں کارروائی کرتے ہوئے ایک مبینہ خاتون خودکش حملہ آور کو گرفتار کرلیا۔ سی ٹی ڈی کی سپیشل ویپنز اینڈ ٹیکٹکس ٹیم نے چھاپہ مار کارروائی کے دوران خاتون کو حراست میں لیا۔

یہ بھی پڑھیں: پچ سے متعلق غلط پیشگوئی پر ڈیوڈ وارنر نے شاہین کا مذاق اڑادیا

گرفتار خاتون کی تفصیلات

حکام کے مطابق گرفتار خاتون خارجی کمانڈر کی تربیت یافتہ رہی جبکہ خودکش حملے کیلئے جیکٹ اور ہدف خارجی کمانڈر کی جانب سے فراہم کیا جانا تھا۔ کارروائی کے دوران خاتون کے قبضے سے 30 بور پستول بمع کارتوس، دو موبائل فونز، ٹیبلٹ، پاور بینک اور دیگر سامان برآمد ہوا۔ موبائل فونز سے کالعدم تحریک سے رابطوں اور خودکش حملے کیلئے رضامندی سے متعلق معلومات بھی حاصل کی گئی ہیں۔

پولیس کا اقدام

انسپکٹر جنرل پولیس ذوالفقار حمید نے کامیاب آپریشن پر سی ٹی ڈی ٹیم کو شاباش دیتے ہوئے نقد انعام کا اعلان کیا ہے۔ سی ٹی ڈی حکام کا کہنا ہے کہ صوبہ بھر میں دہشتگردوں کے خلاف بلا امتیاز کارروائیاں جاری رہیں گی اور ریاست مخالف عناصر کے خلاف زیرو ٹالرنس پالیسی پر عمل درآمد یقینی بنایا جائے گا۔