ایم فل، پی ایچ ڈی کے مقالہ جات اورکتب کی اشاعت کا اردو زبان میں ہدف مقرر کیا جائے، اس طرح خودانحصاری، تحقیق اور تخلیق کی دولت ہاتھ آئے گی

مصنف: رانا امیر احمد خاں

قسط: 317

ایم بی بی ایس کا نصاب

سب سے پہلے ایم بی بی ایس کا نصاب اردو زبان میں نافذ کیا جائے۔ ہر یونیورسٹی میں دارالترجمہ قائم کیا جائے۔ یہاں ایم فل اور پی ایچ ڈی کے مقالہ جات دیگر کتب کی تصنیف و اشاعت کا اردو زبان میں ہدف مقرر کیا جائے۔ اس طرح خود انحصاری، تحقیق اور تخلیق کی وہ دولت حاصل ہوگی جس کے طفیل پہلی جماعت میں داخل ہونے والے بچوں کا 80 فیصد حصہ ماسٹر ڈگری حاصل کر سکے گا اور ایجادات کے صدیوں سے بند دروازے کھل جائیں گے۔

سی ڈیز کی تیاری

پہلی جماعت سے ایم بی بی ایس اور ایم ایس سی تک تمام کورسز آسان فہم اردو زبان میں سی ڈیز پر تیار کئے جائیں، جو بازار میں بآسانی دستیاب ہوں۔ ان سی ڈیز کی مدد سے ٹیوشن کا مذموم کاروبار خودبخود دم توڑ جائے گا۔

دینی مدارس میں اصلاحات

دینی مدارس میں دینی علوم کے ساتھ سائنس اور معاشرتی علوم بھی پڑھائے جائیں تاکہ وہاں سے فارغ التحصیل ہونے والے طلباء صرف عالم دین نہ بنیں بلکہ بڑے سائنسدان بھی بن سکیں۔

مساجد میں تعلیم کا نظام

مساجد کو بھی سکولوں کی طرز پر چلایا جائے اور وہاں پانچ جماعت تک تعلیم دی جائے۔

مقابلے کے امتحانات

تمام تر مقابلے کے امتحانات اردو میں بھی لئے جائیں تاکہ غریب عوام کے بچے بھی اعلیٰ عہدوں پر فائز ہو سکیں۔

شعبہئ تعلیم میں اصلاحات کی ضرورت

2007ء تا 2019ء کے دوران تعلیمی شعبے میں بہتری پیدا کرنے کی غرض سے سٹیزن کونسل آف پاکستان کی جانب سے متعدد موضوعات پر سیمینارز منعقد کئے گئے اور ہفتہ وار اجلاسوں میں غور و فکر کیا گیا۔ ان کی تفصیل درج ذیل ہے: