حالیہ کشیدگی تشویشناک، پاکستان کے ایک ایک انچ کی حفاظت قومی فریضہ ہے، سہیل آفریدی

سرحدی کشیدگی پر وزیراعلیٰ کا بیان

پشاور(آئی این پی) وزیراعلیٰ کے پی سہیل آفریدی نے کہا ہے کہ پاک افغان سرحد پر حالیہ کشیدگی تشویشناک ہے، صورتحال کا بغور جائزہ لے رہے ہیں۔

یہ بھی پڑھیں: سابقہ فاٹا اور پاٹا میں سیلز ٹیکس ترمیمی ایکٹ بحال

قومی سلامتی پر کوئی سمجھوتہ نہیں

پاک افغان سرحدی صورتحال پر جاری بیان میں وزیراعلیٰ خیبرپختونخوا کا کہنا تھا کہ پاکستان کے ایک ایک انچ کی حفاظت ہم سب کا قومی فریضہ ہے، کسی کو سرحدی علاقوں کی سلامتی پر سمجھوتہ نہیں کرنے دیں گے۔ پاک افغان سرحد پر کسی بھی قسم کی اشتعال انگیزی اور بیرونی جارحیت کی مذمت کرتے ہیں، قومی سلامتی پر کوئی سمجھوتہ نہیں ہوگا۔

یہ بھی پڑھیں: وفاقی حکومت کا بجٹ میں کراچی کے منصوبوں کے لیے فنڈز رکھنے کا فیصلہ

تحفظ عوام کی اولین ترجیح

وزیراعلیٰ سہیل آفریدی نے کہا کہ پاک افغان کشیدگی کے تناظر میں متعلقہ اداروں سے مسلسل رابطے میں ہیں، سرحدی علاقوں کے عوام کا تحفظ حکومت کی اولین ترجیح ہے، سرحدی اضلاع میں عوام کی جان و مال کے تحفظ کے لیے ضروری اقدامات کیے جا رہے ہیں۔

ہنگامی صورتحال سے نمٹنے کی تیاری

انہوں نے کہا کہ پاک افغان کشیدگی کے باعث پیدا ہونے والی صورتحال پر عوامی خدشات سے آگاہ ہیں۔ وزیراعلیٰ نے کسی بھی ہنگامی صورتحال سے نمٹنے کے لیے انتظامیہ کو الرٹ رہنے کی ہدایت جاری کر دی اور کہا کہ امن و استحکام کے لیے ذمہ دارانہ طرز عمل ناگزیر ہے۔