پاکستان ایئرٹریفک کنٹرول نے 30 مسافر طیاروں کو وار زون میں داخل ہونے سے بچا لیا

پاکستان ایئر ٹریفک کنٹرول کی بروقت کارروائی

لاہور (ڈیلی پاکستان آن لائن) پاکستان ایئر ٹریفک کنٹرول نے بروقت کارروائی کرتے ہوئے تقریباً 30 مسافر طیاروں کو ممکنہ بڑے حادثے سے بچا لیا، جو خراب موسم کے باعث ایران کے وار زون ایئر اسپیس میں داخل ہونے کے قریب پہنچ گئے تھے۔

یہ بھی پڑھیں: ایرانی وزیر خارجہ 2 روزہ سرکاری دورے پر پاکستان پہنچ گئے

خراب موسم کا اثر

ایئرپورٹ ذرائع کے مطابق سعودی عرب، دبئی اور دیگر ممالک سے آنے اور جانے والی متعدد پروازیں شدید موسمی خرابی کے باعث اپنے مقررہ راستوں سے ہٹ کر ایران کی جانب بڑھ رہی تھیں، جہاں جاری صورتحال کے باعث ایئر اسپیس بند اور انتہائی حساس قرار دی گئی تھی۔

یہ بھی پڑھیں: لاہور؛ دکان میں سلنڈر پھٹنے سے آگ لگ گئی، 5افراد جاں بحق

پروفیشنل مہارت کا مظاہرہ

ذرائع کا کہنا ہے کہ لاہور ایئر ٹریفک کنٹرولرز نے کراچی فلائٹ انفارمیشن ریجن کے ساتھ قریبی رابطے میں رہتے ہوئے نہایت پیشہ ورانہ مہارت اور حاضر دماغی کا مظاہرہ کیا اور طیاروں کو بروقت متبادل ہدایات فراہم کیں۔ اس دوران طیارے ایران کی سرحد کے قریب پہنچ چکے تھے اور کنٹرول سے باہر ہونے کا خدشہ پیدا ہو رہا تھا۔

یہ بھی پڑھیں: ایران کا امریکی فوجی اڈے کو نشانہ بنانے کا دعویٰ

رابطے میں دشواری

مزید بتایا گیا ہے کہ لاہور سے تہران ایئر ٹریفک کنٹرول سے بارہا رابطہ کرنے کی کوشش کی گئی تاہم وہاں سے کوئی مؤثر جواب موصول نہیں ہوا۔ دوسری جانب مشرقی روٹس بھی خراب موسم کے باعث قابلِ استعمال نہیں تھے، جس کے باعث پائلٹس نے کنٹرول ٹاور کو صورتحال سے آگاہ کیا۔

یہ بھی پڑھیں: پیسے کی اہمیت کچھ نہیں، اللہ سے پیسہ مانگنے کے بجائے برکت مانگنی چاہئے، علی امین گنڈاپور

سیکٹر ویسٹ کی صورتحال

ذرائع کے مطابق سیکٹر ویسٹ، قلات سے پنجگور اور گوادر کی جانب جانے والا روٹ شدید موسم کی لپیٹ میں تھا، جہاں زیادہ تر طیارے متاثر ہو رہے تھے۔ اس نازک صورتحال میں ایئر ٹریفک کنٹرولرز نے مہارت سے طیاروں کو محفوظ راستوں پر واپس لاتے ہوئے انہیں وار زون میں داخل ہونے سے روک دیا۔

ایک ممکنہ سانحے سے بچاؤ

حکام کا کہنا ہے کہ بروقت اور مؤثر اقدامات کے باعث ایک ممکنہ بڑا سانحہ ٹل گیا اور تمام پروازوں کو بحفاظت ان کے روٹس پر واپس لایا گیا۔