لاہور کے میو ہسپتال میں پارکنگ مافیا کے خلاف ضلعی انتظامیہ کی کارروائی

شہریوں سے زائد رقم وصول کرنے والے مافیا کے خلاف ایکشن

لاہور(زین بابو) ضلعی انتظامیہ نے میو ہسپتال کی پارکنگ میں شہریوں سے زائد رقم وصول کرنے والے مافیا کے خلاف بڑا ایکشن لیتے ہوئے متعدد افراد کو حراست میں لے لیا ہے۔ یہ کارروائی اسسٹنٹ کمشنر سٹی رائے بابر علی نے ہسپتال کے سرپرائز وزٹ کے دوران موقع پر موجود شکایات کی تصدیق ہونے پر کی۔

یہ بھی پڑھیں: اگر دنیا نے فیصلہ کن اقدام نہ کیا تو یہ اسرائیل کے جرائم میں شریک سمجھی جائے گی، شاہ عبداللہ دوم

خلاف ورزیوں کی تفصیل

انتظامیہ کے مطابق پارکنگ ٹھیکیدار سرکاری نرخوں کی کھلی خلاف ورزی کر رہے تھے۔ شہریوں سے وصول کی جانے والی زائد رقم کی تفصیل کچھ یوں ہے: موٹر سائیکل کے لیے مقررہ 20 روپے کے بجائے 40 روپے وصول کیے جا رہے تھے، جبکہ گاڑی کے لیے مقررہ 30 روپے کے بجائے 100 روپے بٹورے جا رہے تھے۔

یہ بھی پڑھیں: پنجاب اسمبلی میں فلسطینیوں سے اظہار یکجہتی اور اسرائیلی دہشت گردی کیخلاف قرارداد منظور

میڈیا سے گفتگو

اسسٹنٹ کمشنر سٹی رائے بابر علی نے موقع پر میڈیا سے گفتگو کرتے ہوئے کہا کہ ہسپتال آنے والے لوگ پہلے ہی پریشانی کا شکار ہوتے ہیں، ان سے اضافی رقم وصول کرنا ناقابل برداشت ہے۔ انہوں نے واضح کیا کہ کسی بھی منافع خور کو رعایت نہیں دی جائے گی اور سرکاری نرخوں پر سختی سے عملدرآمد یقینی بنایا جائے گا۔

یہ بھی پڑھیں: ارکان اسمبلی کے غائب ہونے کا جعلی پروپیگنڈا کیا جارہا ہے:خواجہ آصف

وزیراعلیٰ کی ہدایات

رائے بابر علی نے مزید کہا کہ وزیراعلیٰ پنجاب مریم نواز کی واضح ہدایات ہیں کہ عوام کو ریلیف فراہم کیا جائے، لہذا تمام پارکنگ ٹھیکیداروں کو تنبیہ کی جاتی ہے کہ وہ مقررہ فیس ہی وصول کریں، ورنہ سخت قانونی کارروائی اور گرفتاریاں عمل میں لائی جائیں گی۔

کریک ڈاؤن کا عزم

ضلعی انتظامیہ نے عزم ظاہر کیا ہے کہ شہر بھر میں اس نوعیت کے کریک ڈاؤن جاری رہیں گے۔